АТИНА ВОВЕДУВА „СЕЈФ СИТИ“ СО ВЕШТАЧКА ИНТЕЛИГЕНЦИЈА Камерите фатиле 2.000 сериозни прекршоци за 4 дена
Регистрирани се околу 800 случаи на пребрзо возење на делот од патот каде што ограничувањето е 90 километри на час, како и 480 поминувања низ црвено светло.
Сообраќајните камери со вештачка интелигенција во поширокото подрачје на Атина регистрирале повеќе од 2.000 сериозни сообраќајни прекршоци за само четири дена, покажаа резултатите од пилот-проектот на грчките власти.
Од вторник до петок, една камера со вештачка интелигенција инсталирана на авенијата Сингру наводно регистрирала повеќе од 1.000 прекршоци поврзани со употреба на мобилни телефони и неносење безбедносни појаси, објави „Катимерини“.
Во истиот интервал, регистрирани се околу 800 случаи на пребрзо возење на делот од патот каде што ограничувањето е 90 километри на час. Исто така, беа регистрирани 480 прекршоци за поминување низ црвено светло.
Пилот-програмата, која започна минатата недела на осум локации со висок ризик по препорака на грчката полиција, е дел од поширока иницијатива за подобрување на безбедноста на патиштата.
– Ова е политичка одлука со јасна општествена цел. Станува збор за намалување на бројот на сообраќајни несреќи и спасување на човечки животи – изјави министерот за дигитално управување Димитрис Папастергиу.
Според него, целта на оваа акција е одвраќање, а не казнување.
– Сакаме граѓаните да знаат дека правилата важат за сите и дека се спроведуваат на фер и современ начин – рече тој.