„Аста Адриа“ аконтативно го исплати данокот на добивка за 2020 година

„Аста Адриа“ се приклучи на иницијативата од Министерството за финансии и Владата на Република Северна Македонија и во петокот, на 3-ти април, изврши аконтативна уплата на целокупниот пресметан данок на добивка за 2020 година во износ од 3.571.720 денари. Преку приклучување кон оваа иницијатива, „Аста трејд“ ДООЕЛ дава свој иницијален придонес за ублажување на ефектите од кризата која ја предизвика коронавирусот SARS-CoV-2.

„Транспортот заедно со логистиката како витална алка во ланецот на снабдување не смее да дозволи да има застој и затоа ние го даваме нашиот максимум за да овозможиме континуитет на секојдневното живеење. Со цел непречено обавување на функциите, компанијата изврши реорганизација и прилагодување на човечкиот, IT и другите капацитети како што наложува состојбата. Достапни 24/7, се грижиме нашите клиенти да добијат навремена и премиум услуга исто како и до сега.

Заболувањето COVID-19, повеќе од било кога побарува од сите нас општествено одговорно однесување во овие критични моменти и почитување на мерките за превенција. Согласно сите препораки и уредби во оптек, во целост се грижиме за здравјето на нашите вработени, нивните семејства и нашите сограѓани. Будно ја следиме состојбата, и во континуитет ќе делуваме на ублажување на кризата и помагање на најранливите категории согласно нашите можности.

Им благодариме на медицинскиот персонал, безбедносните сили и сите директно и индиректно инволвирани во оваа историска борба.

Се надеваме дека нашиот пример ќе ги поттикне нашите соработници, партнери и целата бизнис заедница, согласно со своите можности да го прифатат повикот на Владата за помош преку аконтативно плаќање на обврските кон државата“, велат од компанијата.