Ашколсун, Заев паша! Па ти не само валија и кадија, дури и еким си станал!

Премиерот Зоран Заев, одговарајќи на новинарски прашања за поранешниот генерален секретар на Владата Драги Рашковски, изјави дека она што тој го знае е дека притвореникот Рашковски имал решение од суд, со кое му е дозволено во точно определено време да оди на лекар, заради здравствени потреби.

Ова „објаснување“ дојде откако медиумите вчера објавија фотографија, на која се гледа како Рашковски, кој е во домашен притвор, слободно се движи по улица во скопската населба Аеродром.

Не знам кој што му кажал на премиерот Заев, но тој знае дека една од трите основни причини поради кои на осомничените и на обвинетите им се определува мерка притвор е опасноста да се дадат во бегство. Знам дека знае за ова, бидејќи давал јавни изјави, а и лично сме разговарале на таа тема.

Ако судот издал решение во кое прецизно назначил дека на притворениот Драги Рашковски му е дозволено во „точно определено време“ да оди на лекар, тогаш е направена голема грешка. Притвореникот во домашен притвор не смее да го напушти домот. Ако има „здравствени потреби“ поради кои тој треба да појде на лекар, мора да биде спроведен со полициско обезбедување и потоа вратен дома исто така со полициско обезбедување – на ист начин како што притворениците од Шутка ги носат по болници и ги враќаат назад во притвор.

Но, веќе знаеме дека Заев ја замајува јавноста со недоветни „објаснувања“, а намерата му е да го прикрие фактот дека Рашковски е привилегиран притвореник, како што Зоран Милески Кичеец беше привилегиран затвореник (пак ќе биде), кој доби месец дена отсуство од затвор за да се „лечи“ од тахикардија и така беше учесник во тешка сообраќајка со жртва. Патем, да спомнам дека еден угледен лекар објасни дека било кој вработен за тахикардија може да добие отсуство од работа од 7 до најмногу 15 дена, период сосема доволен да се извршат сите неопходни медицински проверки за да се утврди причината за таа здравствена состојба и да се определи терапија или натамошен третман.

Самиот факт што Заев на новинарите им „објаснува“ зошто некој бил пуштен од затвор или од притвор – нешто што во цивилизирани и демократски земји, во кои постои систем на поделба на власта, не е работа на премиерот – раѓа основано сомневање дека неговото „премиерско“ мислење е пресудно за одлуките на судовите дали обвинетите ќе завршат во притвор или во затвор, колкави ќе бидат затворските казни, дали притворот ќе биде ефективен или домашен, дали за време на притворот некои од притворениците ќе живеат во пеколни услови и под постојани притисоци а други ќе се шлаат по улици, та дури и за тоа дали во Шутка некој ќе има привилегии или ќе умира во карцер.

Зоран Заев е човекот „алфа и омега“ во оваа држава. Го има во сите ролји и во правосудството – тој е и пријавувач на кривични дела, потоа истражител, обвинител и судија, во кризни ситуации е координатор на органите на прогонот, а кога мора е и лекар, пекар, апотекар…

Блазе си ни!