Арсовски: Заев да даде оставка поради бегството на Мијалков, но низ вода ќе го пушти само Спасовски

Партијата СДСМ е неспособнa, бидејќи дозволија по втор пат да им се случи бегство, но овој пат изгледа како добро монтирано и во соработка со СДСМ, бидејќи во текот на денешниот ден нема никаква реакција ниту од СДСМ, ниту од Владата, рече во вечерашното издание на дебатната емисија „Што не е јасно“ портпаролот на ВМРО-ДПМНЕ, Димче Арсовски во врска со бегањето на Сашо Мијалков.

– Граѓаните бараат одговорност од Владата во однос на овој настан, бидејќи доколку земјата се води согласно праксата која што ни ја прикажуваат Заев и Спасовски, тогаш фактите говорат дека македонските граѓани немаат никаква безбедност, односно дека во земјата секој може да влезе и излезе кога сака, независно дали постојат некакви процеси против него – вели Арсовски.

Според него, Министерството за внатрешни работи во овој случај се покажало тотално нефункционално и непрофесионално.

– Независно од тоа дали Спасовски постапува по некоја насока на неговиот претседател Заев, сепак ваквиот чин претставува пример за тоа како функционира држава во која владее хибриден режим. Зоран Заев ќе ја користи оваа прилика да расчисти со своите функционери и сметам дека со овој случај се пушта низ вода Спасовски. После ваквите случувања, неминовна е оставката на Заев и Спасовски, бидејќи тие се директно одговорни за ова бегство на Сашо Мијалков. Иако најверојатно прават нови сценарија и ништо не е случајно, сепак за ваков несериозен пристап кон работите, мора да следува одговорност – вели Арсовски.

Тој рече дека Зоран Заев бил во потесна соработка со многу соработници и актери во овој случај и за тоа мора јавно да даде објаснување, а потоа да поднесе оставка.

– Оваа владина гарнитура нема тежина и истата ќе сноси огромни последици. Ваквите моменти укажуваат на фактот дека земјата ја водат криминалци, рекетари и корумпирани политичари и истите ќе мора да сносат одговорност и да си заминат од функциите, а потоа да одговараат – рече Арсовски.