Арсовски: Ветил ли Заев државни удели на бугарски бизнисмени за поддршка во ЕУ?
Дали е точно дека Заев ветувал на одредени луѓе, дека на патот кон ЕУ, како дел од цената за обезбедување поддршка од бугарската влада ќе биде и директна продажба на одредени државни удели во државни институции коишто ги поседува Република Македонија и владата, кои треба да преминат во капитал на бугарски бизнисмени, удели за кои и најавија продажба од самата Влада на Заев, праша Арсовски.
Треба да се биде објективен и да се признае дека виновник за ветото е Зоран Заев кој дома ветуваше датум, а на Бугарија им ветувал историја, народ, малцинство кое ќе биде дефинирано од бугарската држава, изјави денеска Димче Арсовски, портпарол на ВМРО-ДПМНЕ.
– Клучните политики на Заев и СДСМ со кои го лажеа народот во Република Македонија се разобличени. Тоа се живот за сите и влез во ЕУ. Ниту има живот за сите, ниту влегуваме во ЕУ во блиска иднина. Живот за сите нема затоа што испокрадоа СДСМ сѐ што можеа и сѐ што можеше да се испокраде, додека пак во ЕУ не влегуваме од неколку причини. Најпрвин, проблемот кој го има Бугарија со Република Македонија, не е туку-така настанат, туку настанат е поради несериозната и неискусна „патлиџан“ дипломатија на СДСМ, Заев и Димитров. И оттука слободно можеме проектот на Заев, Димитров, Шекеринска за влез во ЕУ да го прогласиме за политички мртов – рече Арсовски.
Покрај несериозната дипломатија, нивните информации говорат дека Зоран Заев ветувал и многу други работи, кои немаат никаква поврзаност со дипломатија и ЕУ интеграција, туку само со обичен бизнис.
– Па оттука прашуваме и очекуваме одговор: Какви концесии има Зоран Заев кон бугарската Влада и поединци од таму, кои што денес се една од пречките за ЕУ интеграција на Република Македонија? Дали се работи за бизнис концесии? Кои фактури ќе треба да ги плаќаат граѓаните за шарлатанството на Зоран Заев? Дали е точно дека Заев ветувал на одредени луѓе, дека на патот кон ЕУ, како дел од цената за обезбедување поддршка од бугарската влада ќе биде и директна продажба на одредени државни удели во државни институции коишто ги поседува Република Македонија и владата, кои треба да преминат во капитал на бугарски бизнисмени, удели за кои и најавија продажба од самата Влада на Заев? Тука би ги потенцирал делот кој го поседува Владата во Телеком, железничкиот транспорт, ТЕЦ Неготино, Македонски пошти и уште неколку приватни компании – рече Арсовски и нагласи дека Заев им го должи овој одговор на граѓаните што побрзо.
Тој повтори дека е потребна Влада за национален спас, „наспроти шарлатан како премиер кој лаже кај стигне и распродава сѐ живо“, од кого побара итна оставка.