Арсовски: На Заев му се брза да го заврши „Рекет“ за да не се дознаат нарачателите

На Заев и СДСМ им се брза што побрзо да го завршат случајот „Рекет“ пред изборите, за да не се дознаат нарачателите на случајот „Рекет“. Заев е свесен дека само во вакво „трас-трас“ судство ќе може да се извлече од очигледниот случај фатен за рекетирање, оцени денеска Димче Арсовски, портпарол на ВМРО-ДПМНЕ.

Според него, да имаше правда наместо изврштителите, нарачателот Заев ќе беше на обвинителна клупа.

– Да имаше правда и независно правосудство, денеска на обвинителната клупа за случајот „Рекет“ за завршни зборови ќе беше подготвен Зоран Заев. Но, бидејќи Заев ги уценува сите, а Вилма Русковска му е под целосна контрола, денеска завршни зборови во случајот „Рекет“ ќе има само за двајца извршители, кои исто така се уценети од Зоран Заев и мораат да молчат и да не ја кажат вистината – рече Арсовски.

Тој смета дека од самиот почеток случајот се води непрофесионално и аматерски. Најпрвин извршителите били известени од Зоран Заев дека сите сѐ знаат за рекетот, а потоа им било допуштено одреден период да бришат, прикриваат докази и губат телефони во кои што има доказен материјал.

– Ова што ќе го видиме и слушнеме денеска во завршните зборови е само фарса за пред граѓаните, да се спаси Зоран Заев од сигурен затвор за случајот „Рекет“, односно за рекетирање на над 1,5 милиони евра од бизнисмен. Денеска гледаме дека Зоран Заев е заглавен до гуша во криминал, а граѓаните на големо ја зборуваат неговата улога во случајот „Рекет“. Сите знаат кои се извршителите, а кој е главниот организатор. Тоа е Зоран Заев. Но, тоа ќе го докаже независното правосудство и судство кое не е уценето од Зоран Заев – додаде Арсовски.