„АРСОВСКА СЕКОЈ ДЕН ПРАВИ ШОУ, А НИШТО НЕ ПРЕЗЕМА“ Николоски ја разоткри скопската градоначалничка

Министерот за транспорт и врски Александар Николоски, одговарајќи на пратеничко прашање, попладнево порача дека Министерството има надлежност само за градби од А категорија, а за сите објекти за кои секојдневно зборува градоначалничката Данела Арсовска, одговорен е Град Скопје.

– Сакаме да ја информираме јавноста дека целосна надлежност за тие објекти има градоначалникот на Град Скопје преку градежната инспекција. Наместо спектакли и настапи во медиумите, нека излезат со инспекција и нека утврдат дали објектите се дивоградби – рече Николоски.

Тој додаде дека ако се утврди дека станува збор за бесправна градба, Градот има право и обврска да постапи – да распише тендер за рушење, да ги сноси трошоците инвеститорот и да поднесе кривична пријава до обвинителство. Доколку се утврди дека објектите се градени на државно земјиште, имотот може да се конфискува.

– Ништо од ова досега не е направено од страна на градоначалничката Арсовска. Наместо постапување според закон, секојдневно се гледаат спектакли во јавноста, без правни дејствија. Тоа не води до други заклучоци, дали позадината е политичка, и дали се работи за релации со функционери од ДУИ? – праша Николоски.

Арсовска беспоштедна кон Николоски, Скопје нема градежна инспекција

Градоначалничката на Град Скопје, Данела Арсовска, жестоко реагираше на изјавата на министерот за транспорт и врски Александар Николоски, кој обвини дека Арсовска секојдневно приредува „спектакли“ со дивоградбите, а ништо не презема институционално.

Арсовска директно го прозва Николоски велејќи дека или не го знае законот, или свесно манипулира со јавноста.

– Ќе му пише ли некој на неписмениот што глуми министер дека Град Скопје, согласно закон, е единствена од 81 општина што нема градежна инспекција. Ќе повторам, така е утврдено со закон. И тоа одамна. Наместо да манипулира, нека се информира – истакна Арсовска.

Таа нагласува дека надлежен за постапување е Државниот инспекторат за градежништво, кој е под ингеренции токму на Министерството со кое раководи Николоски.

– Има ли некој од неговите 500 партиски експерти, на човеков што не можеше да добие безбедносен сертификат за да биде министер за надворешни или одбрана, да му каже дека негов орган е Државниот инспекторат за градежништво? – праша Арсовска.

Во реакцијата, таа му порача на Николоски дека за да се постапува против дивоградби, потребно е нешто повеќе од пари и политичка припадност.

– За да го рушиш Вики, господине министер, треба нешто повеќе од пари и партија. Треба интегритет и храброст, а тоа се две нешта што ти ги немаш – истакна таа.

Градоначалничката потсети и дека Министерството за внатрешни работи веќе поднело кривични пријави за дивоградби во Делчево и Македонска Каменица, што според неа е доказ дека системот може да функционира – но не и во Скопје.

– Појаснете му на Ацо туристот од Дубаи дека пред некој ден МВР поднесе кривични пријави за дивоградби во источна Македонија. Ама среќа Чаир не е таму. Само во Скопје овие циркузанти што си играат државници немаат ингеренции за ништо – заклучи Арсовска.