„АРСОВСКА МЕ КЛОЦНА НАД ЛЕВАТА КОЛЕНИЦА, ЈАС СУМ ЖРТВА“ Обвинетиот Јамалари тврди дека не ја нападнал скопската градоначалничка
Тој ден јас не нападнав никого, бев нападнат од градоначалничката. Таа пријде кон мене со телефон, јас само со рака ѝ мафтав, сакав да ѝ го тргнам телефонот, да не снима неовластено, изјави Јамалари на денешното рочиште во Кривичниот суд.
Во Основниот кривичен суд денеска продолжи судскиот процес против Сулејман Јамалари, обвинет за грубо насилство врз градоначалничката на Скопје, Данела Арсовска, со физички и вербален напад.
Јамалари пред судот тврди дека не е напаѓач, туку жртва на инцидентот што се случи на 11 јули 2025 година кога Арсовска беше на терен со овластени службени лица, а по пријава за бесправна градба.
Јамалари беше испрашуван од неговата бранителка Иванка Јакимовска, како дел од изведувањето на докази од одбраната. Тој категорично ги отфрли обвинувањата, тврдејќи дека е жртва, а не напаѓач.
– Тој ден јас не нападнав никого, бев нападнат од градоначалничката. Таа пријде кон мене со телефон, јас само со рака ѝ мафтав, сакав да ѝ го тргнам телефонот, да не снима неовластено – изјави Јамалари пред судот.
Обвинетиот тврди дека дошло до вербална расправија и до физички контакт, при што, според него, оштетената го удрила со нога.
– Оштетената ме удри со нога, ме клоцна со нога… Тука над коленицата, на левата нога – рече тој.
Јамалари наведе дека на местото на настанот бил присутен со електричен тротинет, кој, како што рече, „во ниеден момент го немав пуштено од рака“. Според неговите тврдења, инцидентот бил снимен од страна на градоначалничката и нејзиниот тим, а тој лично не направил никакви снимки.
Обвинетиот изјави и дека по инцидентот на 11 јули 2025 не можел веднаш да оди во болница, бидејќи бил задржан во полициска станица. Иако бил прегледан истиот ден, медицинските резултати пристигнале дури по полноќ.
Во сведочењето пред судот, Јамалари потврди дека имало обострани пцовки меѓу него и градоначалничката Данела Арсовска, при што наведе конкретни навредливи зборови упатени кон него. Тој додаде дека не се сеќава дали пцуел други присутни, но тврди дека целата екипа на градоначалничката го навредувала.
На прашањето дали се чувствува оштетен, Јамалари одговори потврдно . Истакна дека сака градоначалничката да одговара за, како што рече, „она што го направила“.
Претходно, на првото рочиште кога обвинетиот се изјасни за невин, градоначалничката Данела Арсовска, го опиша настанот како „агресивен и опасен“. Во своето сведочење Арсовска изјави дека се чувствувала „загрозено, несигурно и исплашено“, а нападот, според неа, траел над 40 минути. Таа нагласи дека „агресијата континуирано растеше“ и дека „интервентната полиција мораше да нè вади“.
Според обвинителниот предлог, Јамалари пристигнал со електричен тротинет и ја нападнал физички и вербално градоначалничката Арсовска, при што ѝ нанел телесни повреди и ѝ изрекол сериозни закани.
Судењето го води судијката Билјана Коцевска, а застапник на обвинението е обвинителот Александар Давчевски.