АРСОВСКА ДОНИРАШЕ БОЖИЌНИ ПАКЕТИ НА ЗГРИЖУВАЧКИ СЕМЕЈСТВА Град Скопје ќе биде поддржувач на активностите на СОС Детско село

Градоначалничката на Град Скопје, Данела Арсовска посети дел од згрижувачките семејства на СОС Детско село Скопје кои згрижуваат и овозможуваат топол дом и семејство на поголем број деца во социјален ризик, деца без родители и деца и млади кои се лишени од правото на родителска грижа.

Арсовска при посетата достави пакети со прехранбени производи до СОС Детското село за 68 загрижувачки семејства како и подароци за децата.

–  Денеска посетивме дел од семејствата и ги изненадивме најмалите со подароци, нема нешто поубаво од детска насмевка и радост, знаејќи дека имаат топол дом и згрижувачко семејство кое се грижи за нив. Овие згрижувачки семејства, со својата хумана мисија не само што обезбедуваат топол дом и семејство за дечињата од СОС Детското село, туку и им се и голема поддршка. Градот Скопје ќе биде активен партнер и поддржувач на мисијата и активностите на СОС Детското село и на овие згрижувачки семејства – изјави Арсовска по посетата на СОС Детското село.

Таа го посети и Ресурсниот Центар на СОС Детското село, каде што оствари средба со директорката Александра Ивановски, семејства корисници на услугата советување и менторство по напуштање на грижа, како и со неколку млади кои имале статус деца без родителска грижа.