Архитекти и работници од културата со поделено мислење за судбината на Универзална сала

Претставници на државни и културни институции, здруженија на граѓани од областа на културата, спортот и архитектурата, како и претставници на организатори на фестивали и културни манифестации денеска разговараа за моменталната состојба во која се наоѓа Универзалната сала, за нејзината иднина и за потребите на фелата и на публиката, на трибината што се одржа во просториите на МКЦ, а во организација на Град Скопје.

На трибината присуствуваше и градоначалникот Петре Шилегов кој ги слушна идеите и мислењата на присутните.

Советникот  на Град Скопје, Васко Лазаревски, информира дека од Градот се разгледуваат 3 опции во врска со Универзалната сала – постојната сала да се реизгради на истото место; да се изгради нова сала на нова локација, или, во исто време и да се обнови стариот објект и да се гради нова сала.

– Немам цврст став која од трите понудени опции е најдобра. Но, ова е одлична прилика да се слушне ставот на луѓето што ќе ја користат, за да одговориме на прашањето – што точно ни треба – рече Русе Арсов, директорот на МКЦ.

За Роберт Алаѓозовски, националниот координатор за развој на културата, понудената визија на градоначалникот да се зборува за нова локација и нов функционален простор е смела и треба да се поддржи.

Мартин Пановски, од Асоцијацијата на архитекти на Македонија вели дека на градот не му треба руин, туку нов објект.

–  Во градот под итно треба да се смени мислењето за просторот, ние со оваа Универзална сала која е руинирана ги едуцираме нашите деца на лоша урбана култура. Овој објект не смее да остане долго ваков, зашто Универзалната сала за нас архитектите и за македонската архитектура значење нема – рече  Пановски.

Мирко Попов од ПМГ Колектив рече дека сегашната Универзална сала е објект – ругло на градот. Тој смета дека треба да се урне и да се изгради нов објект според најновите стандарди за организирање културни настани.

Директорот на Универзална сала Филип Аврамчевсмета дека Универзална треба да се реставрира, а одделно да се изгради концертна сала.

– Две години сум директор на нефункционален објект. На Скопје му фали Универзална сала, но повеќе му фали концертна сала. Мојата идеја е што побрзо да ја реставрираме Универзалната сала, но и да изградиме нова сала за концерти – рече Аврамчев.

Архитектот Ангел Ситновски е на ставот дека граѓаните треба да одлучат дали да се реконструира постојната сала и дали да се гради сала на друго место, архитектите треба да понудат решенија, а Градот да обезбеди финансиски средства.

– Сум организирал најмногу настани во Универзалната сала. Уште од `90-години апелирам да се реши проблемот со „лименката“ и да се реши недостигот од летна сцена во Скопје. На Скопје му треба концертна сала со овој капацитет и тоа што побрзо. Тоа треба да го оставиме на стручната екипа во Градот, да одлучат дали има адекватен проект за сала на тоа место – рече Оливер Белопета, од Скопски џез фестивал.