📷 АПАСИЕВ ВО ГРЦИЈА, СЛАВЈАНКА ВО ОХРИД, МИЛОШОСКИ ЌЕ КОМБИНИРА… На кои плажи ќе се печат пратениците?
Плусинфо разговараше со неколкумина пратеници од различни политички партии и им го постави прашањето: „Каде и со кого ќе го поминете летниот одмор?“.
Пратениците утре заминуваат на годишен одмор и нема да работат сѐ до 2 септември.
Поголемиот дел од нив веќе имаат избрано дестинација и веќе го имаат испланирано летното уживање.
Плусинфо разговараше со неколкумина пратеници од различни политички партии и им го постави прашањето: „Каде и со кого ќе го поминете летниот одмор?“.
Ви пренесуваме дел од одговорите:
Димитар Апасиев, пратеник и лидер на Левица:
„Сѐ уште не сме одлучиле, но голема е веројатноста одморот да го поминам во Грција заедно со семејството“.
Антонио Милошоски, пратеник од ВМРО-ДПМНЕ:
„Одморот ќе го користам комбинирано.
Неколку дена ќе поминеме на Егејско Море, а неколку дена на охридското крајбрежје.
Секако, заедно со сопругата и со децата“.
Славјанка Петровска, пратеничка од СДСМ:
„Искрено да ви кажам, малку сум болна периодов, се борам со некаква инфекција и воопшто не сум размислувала каде да го поминам летниот одмор.
Секако дека Охрид не ми бега, но за надвор од границите сѐ уште немам скроено никаков план“.
Бејџан Иљас, пратеник и лидер на Турска демократска партија:
„Јас веќе бев на одмор заедно со семејството во Турција.
Сега одморот ќе го поминеме со партиски активности, меѓутоа ќе присуствувам на познатиот Јуручки фестивал во радовишкото село Тополница кој ќе се одржи на 25 август.
Не сум директно вклучен во организацијата, но им помагам на моите пријатели“.
Моника Зајкова, пратеничка и лидер на ЛДП:
„Одморот ќе го поминам на вториот крак во Грција, заедно со семејството“.
Бобан Карапејовски, пратеник на ЗНАМ:
„Одморот ќе го поминам онаму каде што секојпат се чувствувам најубаво и најисполнето, а тоа е Охрид.
Оваа година одлучив да не ги напуштам границите на државата и да им се препуштам на убавините на Македонија“.
Пратениците ќе бидат на одмор од 15 август до 2 септември, но бидејќи Собранието е во постојано заседание не се исклучува можноста да се свикаат седници на работните тела или пленарна седница доколку се работи за некој итен случај, велат од Кабинетот на претседателот на Собранието, Африм Гаши.
Од почетокот на работата на овој парламентарен состав на 28 мај се одржани десетина седници, а последната беше вчера кога беа донесени измените на Законот за здравствена заштита и се укинаа економските директори.