ЈАНЕВСКА ЌЕ СЕ ЗАЛОЖИ ЗА ПОВИСОКА СУМА ЗА СТУДЕНТСКИ ОБРОК „Треба да имаат услови да учат, за да придонесат за развој на државата“

Зголемување на сумата за студентки оброк, која сега е 140 денари дневно, може да има од следната година, најави министерката за образование Весна Јаневска. Таа рече дека го добила барањето за зголемување на сумата за субвенциониран оброк од Универзитетското студентско собрание.

– Јас со задоволство можам да речам, ми се чини прв пат, студентите имаат партнер во Министерството и не се чувствуваме како опозициски страни, напротив, се чувствуваме како пријателски страни. Сè што побарале досега беше остварено и исполнето. Ова прашање стигна до мене. Мислам дека во иднина би можеле да се договориме, но во овој момент не можам да гарантирам, затоа што буџетот на Министерството за образование зависи од буџетот на државата. Секако дека ќе се залагам доколку е можно и оваа година да биде остварено, затоа што јас искрено мислам дека тие треба да имаат услови, за да може да учат и искрено мислам дека тие се тие што ќе придонесат за развој на државата – рече министерката Јаневска.

Студентите почнаа да добиваат пари за оброк во 2020 година, а во 2023 година Собранието изгласа измени на Законот за студентските оброк, со кои предвиде износот да се зголемува со зголемување на инфлацијата, па почетниот износ од 120 денари дневно беше покачен на 140 денари. Законот предвидува еднаш годишно да се прави усогласување по завршување на фискалната година, а пред донесување на државниот буџет за следната година.