Андоновска: Соседните држави имаат вакцини против корона, а Филипче нема ниту план

Сите земји во регионот се посветени и организирани на зачувување на здравјето на граѓаните, само кај нас тоа не е приоритет. Во Србија стигна вакцина и почнува вакцинацијата, а тестови за корона можат да се купат во секоја аптека за 10 евра. Грција и Бугарија имаат вакцини, а Филипче нема ниту план, уште помалку одреден термин кога ќе стигнат вакцините за да започне вакцинацијата, вели Марија Андоновска, член на ИК на ВМРО-ДПМНЕ

– Значи кога речиси сите веќе набавија вакцини и стартуваа со вакцинација против корона, Филипче не знае каде тера. Прво, Филипче рече вакцина за корона ќе имало на почеток на следната година, за  потоа да ја смени изјавата дека тоа ќе се случи во март. Вчера објаснува како Македонија била мал пазар па вакцини ќе имало во втората половина на 2021 година. Нема одговори од надлежните за клучните прашања дали, кога и колку дози на вакцини навистина ќе има, како и тоа дали граѓаните ќе имаат избор на различни вакцините кои веќе се употребуваат?

Она што ни го кажува министерот за здравство е спротивно од онаа реалност за која постојано ни сведочат граѓаните. 

Народот поради ова нема доверба во здравството на Филипче. 

Прашање е дали и тој самиот верува во она што го говори, бидејќи ги избегнува средбите кои ги бара опозицијата, а со тоа ги игнорира и прашањата на граѓаните. 

Соседите сите се пред нас, сите се подобро организирани кога во прашање е здравството. 

Грција, Србија, Бугарија сите имаат помала смртност како и соодветни услови за лечење и навремени мерки. 

Како може Србија, која исто не е членка на ЕУ како нас, да набави неколку видови на вакцина и да изгради две болници во овој период, од кои втората само за четири месеци ја кренаа од темел и ја пуштија во употреба. Кај нас шатор не се способни да постават, а камо ли нешто друго. Што направија нашите власти на оваа тема?! Што има во Македонија, едно големо ништо!  Во Македонија големи се само лагите на Венко Филипче! – вели Андоновска.