Американските авиони по 30-часовен непрекинат лет го прелетаа Скопје

Прелетот на американски воени авиони денеска над Скопје е израз на нашата трајна поддршка за Северна Македонија како и гест преку кој што ви посакуваме добредојде како 30-та ченка на НАТО, изјави американската амбасадорка Кејт Мари Брнс.

– Со право и точно е дека во изминатите неколку недели нашиот најголем фокус беше на заедничката борба против ковид-19, но не треба да дозволиме тоа да ги замагли историските достигнувања на земјата –  влезот во НАТО и добивањето зелено светло за отпочнување на пристапните преговори со ЕУ. Ова беа аспирации на нашите две земји повеќе од две децении. И покрај тоа што во изминатиов период нашето внимание беше насочено кон борбата со пандемијата, сепак, со овој предизвик се соочивме заедно како сојузници. Исто така, САД навистина покажува со овој начин дека е тука и го поддржува НАТО сојузот и нашиот нов сојузник. Овој прелет кој што денеска го проследивме е симбол на фазата на продлабочувањето на нашето партнерство – рече Брнз која прелетот го проследи со министерката за одбрана Радмила Шекеринска.

Два авиона на американското воено воздухопловство придружувани од два авиона на грчката воена авијација денеска извршија прелет над територијата на Република Северна Македонија во чест на нашето членство во НАТО.

Американските авиони полетаа вчера од сојузната држава Јужна Дакота и имаа 30-часовен непрекинат лет со полнење гориво во воздух. Авионите над нашата земја летаа на височина од 1.500 метри и нивниот прелет беше проследен со силен звук.

– Денеска и на македонското небо можевме да видиме дека е точна тезата „Ние сме НАТО“, Република Северна Македонија стана 30 членка на НАТО после 30-годишни напори. За жал, немавме можност во сред пандемијата со коронавирусот да го прославиме нашето членство, меѓутоа денешниот настан заедничката координирана акција на нашата Армија заедно со НАТО командите и со воздухопловните сили на САД, покажува дека интеграцијата не е само политичка, туку реална, воена и одбранбена – изјави министерката за одбрана Радмила Шекеринска.

Таа им се заблагодари за оваа акција на САД, кои, како што рече, на дело и со видлив гест ни посакаа добредојде во Алијансата. Шекеринска им честита на сите кои учествуваа во организацијата, затоа што сето ова трае неколку минути, но зад тоа, подвлече, се многу подготовки и работа.

– На дело и на секој тест покажуваме дека нашето членство го заслуживме, со реформи, со соодветни одлуки, меѓутоа и со многу неуморна работа на бројни припадници на Армијата и на други институции во државата. Како резултат на нашето членство во НАТО заедно сме посилни и тезата „Ние сме НАТО“ веќе не е парола, туку навистина е реалност што ја унапреди и стабилноста, но и шансите за економски раст на нашата држава – потенцира Шекеринска.

Полковник Валентин Ивановски, раководител на сектор за воено-воздухопловен авторитет изјави дека  денешниот прелет е сложена воздухопловна операција на воздухопловните сили на НАТО Алијансата со учество на два воздухоплови од САД и четири авиони М 16 од грчкото воено воздухопловство.

Тој појасни дека летот е комплетно организиран од Командата на силите за Европа и воден преку воздухопловните оперативни центри каде е вклучен и нашиот нов воздухопловен оперативен центар и каде што сите летови и координација се извршени преку системот за контрола на воздушниот систем. Воздухопловите полетаа од јужната кота, после долг лет влегоа на бугарската граница каде што беа пресретнати од четири воздухоплови од типот Ф 16 на Грчкото воздухопловство и заедно во формација преку Штип, Велес, аеродромот Петровец прелетаа преку градот Скопје.

– Со ова, после долгата и напорна работа Армијата на РСМ покажа дека успешно се интегрира во еден сложен систем каде што комуникација и координација се вршеше 24 часа. Продолжуваме и понатаму со обуката и интеграцијата и можам да кажам дека сум посебно почестен што учествував во една ваква операција – рече полковник Ивановски.