АМАНДМАНИТЕ НА СДСМ СЕ ПРИМЕР ЗА ЛИЦЕМЕРИЕ Како власт бараа да се укинат заштитните друштва, сега бараат повеќе пари за нив
СДСМ седум години управуваше со ресорот Труд и социјална политика и покажа негрижа, рече пратеничката од ВМРО-ДПМНЕ, Марија Петрушевска во амандманската расправа за Предлог-буџетот за 2025 година.
Ако треба да се објасни што значи хипокризија, како класичен и школски пример можат да послужат амандманите кои ги поднесува опозициската СДСМ, рече денеска пратеничката од ВМРО-ДПМНЕ, Марија Петрушевска во амандманската расправа за Предлог-буџетот за 2025 година на собраниската Комисијата за финансирање и буџет.
– Внимавајте, Социјалдемократскиот сојуз поднесува амандман за зголемување на трансферот на средства до заштитните друштва, а токму Социјалдемократскиот сојуз којшто седум години беше на власт, во 2023 година подготви закон со којшто сакаше да ги намали, односно да ги укине поволностите токму на овие заштитни друштва. И најверојатно со причина последна потпишаната госпоѓа Јованка Тренчевска не е овде да говори на овој амандман – рече Петрушевска.
Таа рече дека СДСМ седум години управуваше со ресорот Труд и социјална политика и покажа негрижа кон оваа група граѓани. Кон тие граѓани, додаде, треба да се постапува со големо внимание и без политизирање.
– Вие демонстриравте негрижа, но денес после само пет години сакате да говорите за социјална правда. И јас, да, сум за социјална правда, меѓутоа вие имавте време точно седум години. Седум години имавте министерки, Мила Царовска, Јагода Шахпанска и Јованка Тренчевска којашто денеска не е тука да говори за амандманот – констатира Петрушевска.