АЛТЕРНАТИВА ИМА ДВЕ ОПЦИИ Да влезе во корумпираната влада или да остане во опозиција
За кризата во енергетскиот сектор, Мицкоски рече дека владејачката гарнитура нема кадри кои можат да се справат со предизвикот и затоа поставуваат хармоникаши на одговорни функции.
Претседателот на ВМРО-ДПМНЕ Христијан Мицкоски истакна дека коалицискиот партнер Алтернатива има две опции. Да влезе во влада, која според него е корумпирана и веројатно најлоша во историјата или да остане во опозиција.
– Немам информации каква одлука ќе донесат од Алтернатива, не сум разговарал со Африм Гаши на таа тема. Од алтернатива и од СДСМ најавија средба на највисоко ниво и наскоро ќе дознаеме дали е постигнат договорот – истакна Мицкоски.
За кризата во енергетскиот сектор, Мицкоски рече дека владејачката гарнитура нема кадри кои можат да се справат со предизвикот и затоа поставуваат хармоникаши на одговорни функции.
За трагедијата со автобусот на „Беса транс“ во Бугарија, во која животот го загубија 45 лица, лидерот на ВМРО-ДПМНЕ не верува дека ќе предизвика било каква одговорност кај надлежните служби.
– Свесно не се појавувавме во јавноста изминативе три дена, дозволете ми уште еднаш да изразам сочувство до роднините на загинатите. Овој немил настан е само продолжение на криминалот и корупцијата што беше актуелна за време на несреќата кај Ласкарци, кога се преврте автобусот на „Дурмо турс“, а потоа се повтори и со трагедијата во Тетово кога се запали болницата – додаде тој.