АКТИВНИ СЕ ТРИ ПОЖАРИ Полицајци и француски експерти гасат кај село Раовиќ
Пожарот кај Раовиќ се простира од село Буковиќ кон селото Чајлане и Матка, а постои можност да се разгори.
Активни се три пожари во земјава, а педестина припадници на Министерството за внатрешни работи (МВР) и неколкумина француски експерти за гаснење пожари интервенираат на пожарот во селото Раовиќ каде што чади на повеќе места, информира Центарот за управување со кризи (ЦУК).
– Овој пожар се простира од село Буковиќ кон селото Чајлане и Матка, а постои можност да се разгори – информираа од ЦУК.
Пожарот на отворен простор помеѓу селата Барово и Вешје е активен и проширен кон висорамнината Витачево, кон село Страгово во Кавадарци. На овој пожар гори сува трева и нискостеблеста шума на тешко пристапен терен. Во Барово дејствуваат 60-тина припадници на полицијата заедно со припадници на армијата, а активен е пожарот во атарот на селото Горно Мелничани, Центар Жупа.
Можеби ќе ве интересира
Под контрола е ставен пожарот кој избувна вчера помеѓу селото Црвена Вода и планинарскиот дом „Китка“, иако на опожарените места сѐ уште чади и догоруваат корења и гранки. Локализиран е и шумскиот пожар кој започна вчера на подрачјето на Кратово, близу селото Емирица.
Како што информираа од ЦУК, целосно е изгасната запалената депонија во Радовиш. Изгаснати се и пожарот во атарите на селата Грумази и Ивени во Општина Новаци, каде гореше сува трева и нискостеблеста шума, како и пожарот кај цело Шипковица на планината Плачковица.