Ако знаел дека е болен и доаѓал на работа ќе се казни техничарот од Кардиологија

Ако се установи дека заразениот вработен на Клиниката за кардиолодија доаѓал на работното место свесен дека има симптоми тука ќе има санкции, најави денеска министерот за здравство Венко Филипче на прес конференција.

Тој објасни дека на Клиниката за кардиологија еден од членовите на резервниот тим на работа пријавил симптоми. Тој работел во ангио-салата каде нема лежечки пациенти, таму лекарите при контакт со пациентите се целосно заштитени.

– Но ако се установи дека на работното место доаѓал свесен дека има симптоми, тука ќе има санкции – рече Филипче.

Во почетокот на следната недела се очекува да се постави мобилната болница на просторот до Клиниката за инфективни болести. Ќе бидат поставени објекти во кои ќе се сместат близу 130 кревети, со соодветни тоалети и суви ходници преку кои ќе се комуницира со самата Клиника, каде е експертизата.

– Во овој момент е добро што имаме линеарно зголемување на случаите, приближно исто секој ден, но спремни сме дури и да има експоненцијален раст. Целосно се мобилизирани здравствените работници, спремни се капацитетите, целосно сме во ситуација да амортизираме. Терапијата што ја најавивме е аплицирана кај сите пациенти кој кои е соодветна. Сосем добро се справуваат колегите во сите јавно здравствени институции – рече Филипче.