АКО ИМА КОРУМПИРАНИ СУДИИ НА ВРХОВЕН, ЗАМИСЛЕТЕ КАКО Е ПОДОЛУ Едни тефтерчиња од минатото се заменија со други тефтерчиња, обвини Мицкоски

Во однос на прашањето дали постои задоволство од казните за спогодба на Иџет Мехмети и Наќе Георгиев, премиерот Христијан Мицкоски на денешната прес-конференција одговори дека е задоволен од тоа што во техничката Влада, токму МВР спроведе перфектна акција кога за првпат на дело покажаа дека имаме корумпирани судии во највисокото тело, тоа е Врховниот суд.

– И ако вие имате корумпирани судии коишто се во највисокото тело, а тоа е Врховниот суд, тогаш можете да си замислите што се случува надолу. Понатаму, во истрагата се потврди дека не бил сам врховниот судија туку и лицето за кое исто така постои спогодба со обвинителството, а тоа е Иџет Мехмети, ако не се лажам како претседател на Советот на јавни обвинители, ако не се лажам. Така што тука е јасна спрегата меѓу судско-обвинителскиот систем кај нас и затоа довербата ни е 2 проценти. Затоа што едни тефтерчиња од едно минато се заменија од други тефтерчиња само овие се од Струмица, Бихаќка и од Речица. И сѐ додека имаме тефтерчиња и сѐ додека не се распуштат овие луѓе нема да имаме правна држава. Ќе повторам, ако нема правна држава нема пари во Буџетот, ако нема пари во Буџет нема вакви проекти – дециден е премиерот.