„АКО ДОЗНАЕ ПАЛЧО, ЌЕ МЕ УБИЕ“ Кешишев ги однел полицајците до местото каде што била закопана Вања
Откопувавме додека не ѝ се видоа носот, веѓата и едната нога и престанавме. Прашавме кој, рече „Палчо, ја земаа и тука ја фрлија, а јас бев на страна“– сведочеше помошникот началник Музафер Каришиќ.
Обвинетиот Влатко Кешишев ги однел полицајците до местото каде што била закопана убиената Вања Ѓорчевска, сведочеше Музафер Каришиќ, кој во времето на убиството бил помошник началник на СВР Скопје за криминалистички работи, на денешното рочиште за судењето за убиството на 14-годишната Вања Ѓорчевска и на 74-годишниот Панче Жежовски.
– Влатко Кешишев го пронајдовме преку „рено кангу“ и разговаравме со него. Во чуден сплет на околности самиот почна да зборува дека е лош човек, дека е нечовек, наговестуваше нешто. Во еден момент рече дека ќе ме однесе мене на едно место, да ми покаже нешто, бараше да одиме сами не сакаше да одиме со другите началници, сакаше јас и тој сами, ми рече „ако дознае Палчо ќе ме убие“. Тоа беше во полициската станица Кисела Вода. Тргнавме, нѐ однесе до запалениот „цитроен“. Се предомислуваше дали да каже, дали не. Па во еден момент рече „ајде ќе ве однесам, има еден црн пат“. Возевме по негови насоки, се качивме едно 200-300 метри, рече „излезете“. Тоа беше еден широк простор. Сакаше да каже, па рече, „не можам, не можам“, па пак тргна накај возилото, па сакаше само со мене да разговара, па рече „ајде, нека биде“, и со главата ми посочи кон расфрлени перници и душеци. Дури и со рака не сакаше да покаже, покажуваше со главата кон перниците. Велеше „јас стоев на страна“. Ги тргнавме перниците, тој рече „тука е девојчето кое го барате“. Откопувавме додека не ѝ се видоа носот, веѓата и едната нога и престанавме. Прашавме кој, рече „Палчо, ја земаа и тука ја фрлија, а јас бев на страна“. За Боре дознавме исто од Кешишев, тој рече „Боре каратисот“ беше во „цитроенот“ – сведочеше помошникот началник Каришиќ.
Кешишов им покажал на полицајците и каде се фрлени лопатите.
Адвокатот на Кешишев го праша Каришиќ зошто обвинетиот Влатко бил исплашен од колегите на началникот.
– Не знам, имаше чувство на страв, не знам зошто конкретно – рече тој.
На прашањето дали имало траги од физичко малтретирање кај Кешишев, Каришиќ рече „не“.
Кога бил приведен Кешишев, со него биле уште две лица, кои биле задржани во полиција 6 часа. Една од нив била сопственичката на возилото „рено“.
Адвокатот на Љупчо Палевски Палчо го праша началникот Каришиќ дали е најден пиштолот.
-Не – одговори Каришиќ и додаде дека тој лично не проверил дали некој од обвинетите имал дозвола за носење оружје.
Тој додаде дека секој има свои обврски во полицијата и мисли дека неговите колеги направиле парафинска ракавица.