АХМЕТИ ДЕЛИ ИСТОРИСКИ ЛЕКЦИИ, А ЗЕМА ТРГОВСКИ ЦЕНТРИ Се сеќавате на играњето фудбалчиња по канцеларии, праша Мицкоски
Ахмети не кажува ниеден збор што ќе направи да ги задржи Албанците во своите родни места, но нему не му е до Албанците, тој само се заканува и игра на етничка карта. Сакам да му порачам дека овие лекции се научени и се минато, ние читаме една нова книга за Македонија, рече претседателот на ВМРО-ДПМНЕ Христијан Мицкоски на вечерашниот митинг во Битола.
СДСМ на овие избори настапуваат со слоганот „се бориме за нашиот дом“, и сè е тоа фино, ама забораваат дека пред година и три месеци тие управуваа со домот. И она што го затекнавме не беа нарушени, туку уништени темели. Кога ќе се сетам дека првите одлуки кои ги донесов како премиер беа да враќаме плати кои тие не ги исплатиле и дека делевме субвенции кои тие со години не ги исплаќаа. Секој ден во Владата ми доаѓаше по некој кој сведочеше за рушвет, тоа трае и денес, рече претседателот на ВМРО-ДПМНЕ Христијан Мицкоски на вечерашниот митинг во Битола.
– Се сеќавате дека 500.000 наши сограѓани, поточно секој трет човек во државата живееше со 150 денари на ден? Дека имаше двоцифрена инфлација, дека го руинираа животниот стандард на чие кревање напорно и постепено работиме. А ДУИ беа господарите кои одлучуваа за целата економија, за тендерите, купуваа трговски центри, бензински пумпи, скапи деловни простории и што уште не. Се сеќавате ли на играњето фудбалчиња во канцеларии – праша Мицкоски.
Тој укажа дека тоа време на народот не му донесе ништо добро.
– Го слушам Филипче како се потсмева на тоа што на пензионерите им се зголемуваат пензиите за 1.000 денари, а намерно пропушта да каже дека за година и пол пензиите се зголемија за цели 5.000 денари, што покажува дека има разлика со времето кога тие наместо да даваат, земаа од пензионерите. Јас сфаќам дека и 5.000 денари не се големи пари за Филипче кој е научен на јахти, згради и веселби во Дубаи, но ние го испорачавме тоа што го ветивме – укажа Мицкоски.
Што се однесува до Ахмети, додаде тој, тажна е сликата како се присеќа и дели некакви историски лекции, додека неговиот народ се иселува поради неговото криминално владеење.
– Човекот води кампања за локални избори, а не пропушта да спомне историска лекција. Но, додека беше во Владата не заборави своето семејно портфолио да го зголеми со еден убав трговски центар во центарот на главниот град, неговите соработници да купуваат скапи деловни простории. Но, затоа не кажува ниеден збор што ќе направи да ги задржи Албанците во своите родни места, но нему не му е до Албанците, тој само се заканува и игра само на етничка карта. Сакам да му порачам дека овие лекции се научени и се минато, ние читаме една нова книга за Македонија која е развиена, а младите што се селеа поради таквите како него, да се вратат во државава – заклучи Мицкоски.