АГЕНЦИЈАТА ЗА ВРАБОТУВАЊЕ ФАВОРИЗИРАЛА НЕВРАБОТЕНИ Проектите од Скопје и од Западна Македонија добивале двојно повеќе пари

Агенцијата за вработување исплаќала пари по програми без да утврди ранг-листа на лицата кои конкурирале за тие програми (според правилото „прв дојден, прв услужен“) и ги фаворизирала конкурентите од Скопје и од Западна Македонија на кои им исплаќала два пати повисоки износи од утврдените проценти, наместо да ги распредели парите според развиеноста на регионите, утврдиле ревизорите во извештајот за работа на Агенцијата за 2022 година. Ревизорите се сомневаат и во реалноста и во објективноста на финансиските извештаи и во усогласеноста со законската регулатива, упатства и воспоставените политики.

Ревизијата утврдила и дека Агенцијата трошела ненаменски дел од парите наменети за невработените, додека исплаќала додаток на плата за зголемен обем на работа но за него нема и соодветен законски основ и без утврдени критериуми за избор на вработените лица кои го добиваат овој додаток. Исто така не го почитувала и договореното времетраење за ангажман на лица на определено време.

Со спроведената ревизија ревизорите утврдиле дека исплатата на паричен надомест во случај на невработеност во 2022 година се во висина од 1.407.710.000 денари (22,8 милиони евра), што претставува 42,62% од вкупните расходи на АВРСМ, и во однос на 2021 година исплатениот износ бележи намалување за 116.247.000 денари (1,8 милиони евра).

Ревизорите утврдиле дека кај дел од анализираните предмети документацијата е некомплетна, а дел од документацијата се обезбедува или се изготвува по истекот на законски утврдениот рок.

За реализација на вкупно 14 програми и мерки за вработување предвидени со Оперативниот план во 2022 година исплатени се вкупно 1.420.000 денари (23.000 евра) односно 43% од вкупните расходи на АВРСМ. Овој износ бележи зголемување во однос на 2020 и 2021 година од 4%.

Со анализа на поединечните мерки ревизорите утврдиле дека за три мерки – „субвенционирање на плати“, „вработување и раст на правни субјекти“ и „практикантство“ за кои е исплатен вкупен износ од 468.126.000 денари (7.611.804евра). Во овие програми не се вклучени одредби врз основа на кои ќе се изработат ранг листи на лица на кои ќе им бидат одобрени средства и лица кои ќе бидат одбиени во случај на поголем број пријавени кандидати при што усвоена е пракса за одобрување на апликациите по принцип прв пристигнат прв услужен.

При распределбата на средства ревизорите утврдиле дека не е почитуван принципот на рамномерен регионален развој на осумте плански региони според документите за распределба на парите.

„Притоа за дел од планските региони се исплаќа повисок износ на средства во однос на утврдените проценти за учество во Одлуката за класификација на планските региони според степенот на развиеноста. Повисок износ е исплатен кај скопскиот плански регион и планските региони во западниот дел од земјата при што во поединечни случаи надминувањето е и двапати поголемо, додека за планските региони од централниот и источниот дел на земјата е исплатен понизок износ од утврдената квота со одлуката“, наведуваат ревизорите во извештајот.

Ревизорите нашле пропусти и во административното работење на АВРСМ каде што е утврдено дека не е воспоставен контролен механизам за следење на побарувањата по основ на остварените приходи од неплатен придонес за вработување и невоспоставена меѓуинституционална комуникација за евиденција на пресметана обврска за уплата на сите обврзници.

Исто така е утврдено дека се слаби интерните контроли во врска користење на средствата доделени за активните мерки за вработување.

„Дел од средствата се ненаменски потрошени за набавки кои не се поврзани со доставените бизнис планови на корисниците на средствата“, се наведува во извештајот.

Агенцијата за вработување, според ревизорите, има слабости и во делот на пописот на опремата и усогласување со податоците во сметководствената евиденција со фактичка состојба во однос на сметководствената евиденција на резервата на материјали.

Според ревизорите, во агенцијата се исплаќал и додаток на плата за прекувремена работа за кој нема обезбедено законска основа, а се ангажирани и лица на определено време за вршење редовни работни задачи, но не се почитувало времето за кое биле ангажирани.

Ревизорите утврдиле неправилности и во однос на пописот на опремата и усогласување со податоците во сметководствената евиденција со фактичка состојба во однос на сметководствената евиденција на резервата на материјали.

Во делот на останати прашања ревизорите меѓу другото ги истакнуваат прашањата поврзани со утврдените состојби во делот на недоречености во делот на правната рамка која обезбедува услови за остварување на правата од паричен надоместок.

„Тие придонесуваат за неизедначена примена во практиката, кои се однесуваат на начинот на пресметка на висината на паричниот надоместок при работа со неполно работно време и на условите за престанок на правото на паричниот надоместок“, се наведува во соопштението од ДЗР.