АЕРОДРОМ ЌЕ ДОБИЕ СУПЕРМОДЕРЕН УЧИЛИШТЕН ОБЈЕКТ Почнува надградбата и доградбата на ОУ „Блаже Конески“
Проектната документација предвидува доградба на 26 училници, 13 наставнички кабинети, голем централен хол, просторија за библиотека, дополнителна спортска сала и трпезарија со кујна на вкупна површина од околу 2.500 квадратни метри.
На почетокот на следната година ќе почне доградба и надградба на основното училиште „Блаже Конески” во скопската населба Аеродром, информира на својот профил на Фејсбук градоначалникот на Општина Аеродром Тимчо Муцунски.
Доградбата ќе се врши во две фази за да се овозможи функционалност на објектот во текот на целата година. Проектната документација предвидува доградба на 26 училници, 13 наставнички кабинети, голем централен хол, просторија за библиотека, дополнителна спортска сала и трпезарија со кујна на вкупна површина од околу 2.500 квадратни метри. Делот од училиштето кое е во добра состојба ќе биде задржан во постојниот габарит и истиот ќе биде поврзан со топла врска со новоизградениот објект.
Градоначалникот Муцунски на својата Фејсбук страна истакна дека проектите во образовната инфраструктура се инвестиции во младите, иднината на општината и државата и дополни дека завршување на доградбата и надградбата значи и реализација на едно важно ветување пред граѓаните и проект со кој директно ќе се овозможи модерен и современ образовен процес за сите ученици.
„Капиталните проекти во делот на образовната инфраструктура се уште една потврда за заложбата на Општина Аеродром да обезбеди модерен и современ образовен процес каде учениците и наставниот кадар ќе имаат соодветни услови за реализација на наставата“ – напиша Муцунски.
