Аце Коцевски нема повторно да се кандидира за градоначалник на Велес
Мислам дека е доволно ова што го сторив за граѓаните на Велес. Се надевам дека еден дел од работите кои сега ќе ги започнеме, ќе ги завршиме - рече велешкиот градоначалник.
Градоначалникот на Велес, Аце Коцевски, нема повторно да се кандидира за оваа функција на локалните избори наесен, потврди во емисијата „Утрински брифинг“.
– Нема да се кандидирам за нов мандат. Мислам дека е доволно ова што го сторив за граѓаните на Велес. Се надевам дека еден дел од работите кои сега ќе ги започнеме, ќе ги завршиме – рече Коцевски.
Тој додаде дека во следниот период ќе се фокусира да ги доврши започнатите проекти до крајот на мандатот.
– Најголем предизвик ни е изградба на нов градски, затворен зелен пазар. Утре или задутре ќе биде јавното наддавање. Вчера добив една убава вест од Министерството за животна средина и просторно планирање дека Велес и Штип се влезени во ИПА 3 програмата за изградба на колекторски системи и прочестителни станици. Успевме да дојдеме до целосна техничка документација за изградба на секундарна мрежа за гасификација на Велес. Во моментов се водат преговори со компании кои се заинтересирани да оперираат со гасоводните системи – рече Коцевски.