ЈА СПРЕЧИВМЕ ЕВРОПА ДА Ѝ ОБЈАВИ ВОЈНА НА РУСИЈА Орбан вели има и лоша вест, покрај добрата
Унгарскиот премиер Виктор Орбан вели дека преговорите во Брисел траеле цела ноќ и дека Унгарија, заедно со своите сојузници, успеала да блокира дел од предлогот поврзан со користењето на замрзнатите руски средства.
Унгарија на самитот на Европската Унија спречи директно влечење на Европа во војна со Русија и одби да учествува во финансирањето на Украина преку нов европски заем, вели унгарскиот премиер Виктор Орбан.
Во објава на социјалната мрежа Икс, Орбан наведе дека преговорите во Брисел траеле цела ноќ и дека Унгарија, заедно со своите сојузници, успеала да блокира дел од предлогот поврзан со користењето на замрзнатите руски средства.
„Долга и тешка ноќ е зад нас. Успеавме да го избегнеме непосредниот ризик од војна. Не дозволивме Европа да ѝ објави војна на Русија со користење на руски средства“, напиша Орбан.
Унгарскиот премиер тврди дека таков план би ја изложил Унгарија на огромен финансиски товар.
„Овој план би ја вовлекол Европа во војна и би наметнал финансиски товар од еден трилион форинти на Унгарија. Успеавме да ги заштитиме унгарските семејства“, рече тој.
Тој потврди дека другите земји-членки на ЕУ одлучиле да одобрат финансиска помош за Украина во форма на заем за следните 2 години.
„Дваесет и четири земји-членки одлучија да одобрат воен заем за Украина за следните 2 години. Доколку Украина не е во можност да го врати овој заем, европските земји ќе мора сами да ја покријат отплатата“, напиша Орбан.
Орбан истакна дека Унгарија, Словачка и Чешка не го поддржуваат овој модел на финансирање, нагласувајќи дека соработката во рамките на Вишеградската група е повторно активна.
„За среќа, соработката на В3 е повторно жива. Унгарија, Словачка и Чешка одлучија да не се качат на овој воз. На овој начин, ги поштедивме нашите деца и внуци од товарот на овој огромен заем од 90 милијарди евра“, напиша тој.
Тој додаде дека уделот на Унгарија во заемот ќе изнесува повеќе од 400 милијарди форинти.
И покрај постигнатиот договор од другите земји-членки, Орбан тврди дека подготовките за војна продолжуваат во Брисел.
„Лошата вест е дека подготовките за војна очигледно продолжуваат во Брисел. Унгарија останува гласот на мирот во Европа и нема да дозволи парите на унгарските даночни обврзници да се користат за финансирање на Украина“, рече тој.
Тој заклучи дека само влада на патриоти може да гарантира мир и да спречи испраќање унгарски пари во Украина.
„Доколку имаше бриселска влада во Унгарија, таа ќе ја турнеше земјата во војна и ќе го трошеше секое евро за поддршка на Украина. Ние не можеме и нема да го дозволиме тоа“, заклучи Орбан.
We have endured a long and challenging night.
We managed to avert the immediate risk of war. We did not allow Europe to issue a declaration of war on Russia by using Russian assets.
This plan would have dragged Europe into war and imposed a financial burden of 1000 billion HUF… pic.twitter.com/Jbs1KI6XvA
— Orbán Viktor (@PM_ViktorOrban) December 19, 2025