ПРАТЕНИЧКА ОСТАНА БЕЗ НОГА, НАПАЃАЧОТ ДВАПАТИ ЈА УДРИЛ СО АВТОМОБИЛ Лекарите се борат да ѝ ја спасат другата нога, осомничениот е уапсен

Австралиската независна пратеничка Хелен Хејнс е во критична состојба, откако маж со автомобил ја удрил двапати во близина на нејзината канцеларија во Вангарата, во северниот дел на сојузната држава Викторија. Поради тежината на повредите, лекарите морале да ѝ ja ампутираат едната нога, додека со операција се обидуваат да ја спасат другата. Полицијата го третира нападот како намерен, а осомничениот е идентификуван како 43-годишниот Брендан Нуџент.

Хејнс, која ја претставува изборната единица Инди, синоќа била пренесена со хеликоптер од Вангарата во болницата „Алфред“ во Мелбурн. Шеесет и петгодишната пратеничка и понатаму е во критична состојба.

Полицијата на местото на нападот го уапсила 43-годишниот возач на автомобил „Toyota Land Cruiser“, од Таравинги. Австралиските власти потврдиле дека станува збор за Брендан Нуџент.

Вршителката на должноста надзорник, Ешли Мејсон, најавила дека осомничениот ќе биде испрашан подоцна во текот на денот.

Австралискиот премиер Ентони Албанезе потврдил дека нападот бил намерен и изразил поддршка за повредената пратеничка.

– Хелен Хејнс го претставува најдоброто во нашата политика. Таа е љубезна и сочувствителна личност со интегритет, целосно посветена на луѓето што ги претставува во овој прекрасен дел од Викторија – изјавил Албанезе.

Австралискиот министер за внатрешни работи, Тони Берк, ги пренел исказите на сведоците за начинот на кој се случил нападот.

– Сведоците велат дека возачот направил полукружно свртување за да влезе на паркингот и ја удрил Хелен со автомобилот. Потоа се придвижил наназад и повторно ја удрил – изјавил Берк за радиото на ABC.

Според сведочењата, случаен минувач веднаш притрчал да помогне, го извлекол возачот од автомобилот и го задржал до пристигнувањето на полицијата.

Човекот што интервенирал е Рики Џефрис, сопственик на берберница во близина на канцеларијата на пратеничката Хејнс. Тој го слушнал судирот и веднаш излегол да помогне.

– Немав друг избор освен да го извлечам од автомобилот. Тоа беше исправната работа и најбезбедното решение за сите – изјавил Џефрис пред новинарите.

Тој додал дека возачот имал нож, но не го употребил.

– Само го извади од џебот и го фрли настрана – објаснил Џефрис.

Министерот Берк ја пофалил неговата реакција, истакнувајќи дека цела Австралија може да биде благодарна кога некој ќе покаже храброст и ќе притрча кон местото на опасност за да им помогне на другите.

– Мислам дека цела Австралија е благодарна кога има херој како него, човек што трча кон опасноста – рекол Берк.

По нападот, Берк најавил темелна истрага што ќе ја спроведат безбедносните служби и полицијата, со цел да се утврди дали можеле да бидат преземени дополнителни мерки за спречување на инцидентот и за заштита на другите јавни функционери.

Министерот претходно соопштил дека во последната фискална година биле пријавени 1.067 случаи на закани или вознемирување насочени кон високи функционери. Тоа е зголемување во однос на 951 пријава во претходната година.

– Знаевме дека мора да ја зајакнеме заштитата на луѓето што извршуваат јавни функции и веќе презедовме чекори – изјавил Берк.

Тој додал дека буџетот за безбедност е значително зголемен, но дека точните бројки и детали не можат да бидат објавени.

– Тонот на политичката дебата директно влијае врз она што луѓето се подготвени да го кажат, а последователно и врз она што се подготвени да го направат – предупредил министерот.

Премиерот Албанезе и други австралиски политичари повикале на смиреност и на одговорно однесување во јавниот простор.

Градоначалничката на Вангарата, Ирена Грант, му се заблагодарила на Џефрис за неговата интервенција. Таа рекла дека разговарала со него по инцидентот и дека тој скромно реагирал на пофалбите, како да го направил она што се подразбира.

– Чувствувал дека тоа е негова должност и едноставно го направил тоа. Беше исклучително скромен во врска со својот храбар чин. Заврши неверојатна работа – изјавила Грант.