📷 ПУТИН ГО ПРОСЛАВИ РОДЕНДЕНОТ СО ШРЕДЕР Од медиумите дознал дека „стариот пријател“ е во Москва, па го поканил во својот дом
Кремљ објави заедничка фотографија од рускиот претседател и поранешниот германски канцелар, кој со години одржува блиски односи со Путин, поради што неговите врски со Русија предизвикуваат контроверзии во Германија.
Рускиот претседател Владимир Путин го прославил својот 74 роденден во друштво на поранешниот германски канцелар Герхард Шредер, кого Кремљ во вечерното соопштение го нарече „стар пријател“ на Путин.
Кремљ соопшти дека Путин утрото на 7 октомври од медиумите дознал дека Шредер се наоѓа во Москва, по што го поканил во својот дом, пренесуваат „Ведомости“.
„Претседателот го покани својот стар пријател кај себе. Герхард Шредер беше со Владимир Путин додека шефот на државата вчера го прославуваше својот роденден“, се наведува во соопштението на прес-службата на Кремљ.
Кремљ објави и заедничка фотографија од Путин и Шредер, на која двајцата политичари се наоѓаат во просторија со печка и самовар.
Putin met with ex-German Chancellor Gerhard Schröder on Russian leader’s BIRTHDAY
Putin invited him to his home after learning that Schröder was in Moscow https://t.co/3VP89h6YbX
— RTRussia (@RT_Russia_) October 8, 2026
Шредер во средата престојувал во Москва, каде што се сретнал со вработените во компанијата „ХиперГлобус“, рускиот огранок на германскиот трговски синџир „Globus“.
Поранешниот германски канцелар на почетокот на октомври стана член на надзорниот одбор на компанија која работи во Русија.
Според пишувањата на руските медиуми, Шредер одржал поздравен говор, по што разговарал со вработените зад затворени врати.
Путин претходно зборуваше за Шредер за време на средбата со раководителите на светските новински агенции на Меѓународниот економски форум во Санкт Петербург. Тогаш изјави дека не го смета за личен пријател, туку за еден од најдобрите германски државници.
Шредер (82), кој беше германски канцелар од 1998 до 2005 година, со години одржува блиски односи со рускиот претседател. По почетокот на војната во Украина, тој повеќепати ја посетуваше Русија и се среќаваше со Путин.
Во мај 2026 година, Путин го опиша Шредер како „пожелен“ посредник во евентуалните преговори меѓу Русија и Украина.
Соработката на Шредер со руските компании и неговите контакти со Путин со години предизвикуваат контроверзии во Германија, особено по почетокот на војната во Украина.