ОД СЛЕПО ЦРЕВО, МАКЕДОНИЈА СТАНУВА СТОЛБ НА ЕНЕРГЕТСКАТА МАПА НА ЈУГОИСТОЧНА ЕВРОПА Божиновска во Солун вети дека ќе се изградат интерконекторите кон Грција и кон Србија

Македонија со официјалното приклучување кон Вертикалниот гасен коридор прави историски чекор кон прекин на долгогодишната зависност од една гасна рута и отворање кон нови извори и пазари, рече во своето излагање министерката за енергетика, рударство Сања Божиновска на Шестиот Метрополитен самит во Солун.

– По три децении ја прекинуваме целосната зависност од само една гасна рута и градиме инфраструктура која ќе ја постави Македонија на новата енергетска карта на Европа – рече Божиновска.

Министерката посочи дека изградбата на гасниот интерконектор со Грција напредува според планираната динамика. Со новата гасна врска Македонија ќе добие директен пристап до јужниот гасен коридор и до можностите за снабдување преку ЛНГ терминалите во Ревитуса и Александруполис, со што се отвора пристап до диверзифицирани извори на природен гас.

-Ова не е само проект за нас. Ова е пристап до алтернативни извори на гас за целиот регион. Со интерконекторот ја зголемуваме сигурноста на снабдувањето, создаваме услови за поголема конкуренција и ја зајакнуваме регионалната енергетска отпорност“, истакна Божиновска.

Божиновска во своето обраќање ја нагласи и стратешката важност на интерконекторот со Србија, преку кој Македонија ќе воспостави нова гасна врска кон север.

-Нашата визија не застанува на границата со Грција. Продолжуваме со интерконекторот со Србија, со што создаваме западнобалкански крак кој го поврзува југот со Централна и Источна Европа – рече таа.

Божиновска оцени дека со паралелното развивање на гасните интерконекции со Грција и Србија Македонија ја трансформира својата позиција – од крајна точка на гасниот систем во потенцијален регионален транзитен енергетски коридор.

-Ние го трансформираме регионот од пасивна крајна точка во активен транзитен коридор. Нашата земја има амбиција да биде енергетска врска меѓу југот и Централна и Источна Европа – рече таа.

Министерката нагласи дека инвестициите во гасната инфраструктура се дел од поширока енергетска транзиција и дека новите интерконектори мора да бидат подготвени за идните технологии.

-Нашата визија оди подалеку од традиционалните енергенси. Архитектурата што ја градиме денес мора да биде доволно флексибилна да ги поддржи енергетските системи на утрешнината – рече Божиновска.

Божиновска посочи дека новата инфраструктура се развива со перспектива за идниот транспорт на водород и со цел да биде компатибилна со долгорочните европски цели за декарбонизација.

Покрај гасната инфраструктура, министерката ги истакна и инвестициите во обновливи извори на енергија, особено сончевата и ветерната енергија, како и потребата од модернизација и зајакнување на електроенергетските мрежи и прекуграничните интерконекции.

-Енергетската транзиција не е само промена на енергентите. Таа е изградба на нов систем – со повеќе извори, повеќе врски, повеќе флексибилност и поголема отпорност – рече таа.

Таа порача дека Македонија останува целосно посветена на европската визија за поврзан, конкурентен и отпорен енергетски систем.

-Подготвени сме за работа, подготвени сме за инвестиции и подготвени сме да бидеме сигурен столб на енергетската отпорност на Југоисточна Европа – рече Божиновска.

Попладнево, во рамките на 10. Форум за енергетика на Југоисточна Европа (SEEF), Божиновска ќе го потпише меморандумот за соработка, со што Македонија и официјално ќе се приклучи кон Вертикалниот гасен коридор.