ИСПОВЕД НА ПОРАНЕШНИОТ СОПРУГ НА ЏЕЈ ЛО „Сè околу неа е лага, ме изневери со Диди, а бракот со Афлек беше ПР-трик“

Повеќе од четврт век по разводот од Џенифер Лопез, нејзиниот прв сопруг Ојани Ноа повторно ја отвори Пандорината кутија со низа тешки обвинувања на сметка на светската музичка и филмска ѕвезда. Во интервју за британскиот „Сан“, кубанскиот актер и фитнес тренер тврди дека јавноста со години гледала внимателно изградена слика која, според него, нема многу допирни точки со реалноста.

Ноа, кој беше во брак со Лопез од 1997 до 1998 година, вели дека пејачката не го изневерила само него, туку и својата публика. Тој тврди дека нејзината приказна за тешко детство и пробивање „од улица до врвот“ е дел од имиџот што внимателно бил создаден за потребите на шоу-бизнисот, додавајќи дека таа всушност потекнувала од стабилно семејство и уште многу рано започнала да гради кариера.

Најтешките обвинувања се однесуваат на раперот Шон „Диди“ Комбс. Ноа тврди дека токму за време на нивниот брак Лопез започнала блиска врска со музичкиот продуцент, кој работел на нејзиниот прв албум. Според него, тогаш започнале лагите, недовербата и распадот на нивниот брак. Тој дури раскажува дека имал и директна пресметка со Диди, кого го нарекува „кукавица“, бидејќи, како што тврди, секогаш бил опкружен со телохранители.

Поранешниот сопруг тврди и дека Лопез во еден момент му признала дека се чувствува исплашена од однесувањето на Диди. Според неговата верзија на настаните, тој интервенирал кога раперот дошол во нејзиниот дом во Лос Анџелес, а нивниот конфликт за малку ќе прераснел во физичка пресметка. Овие наводи не се независно потврдени, а Џенифер Лопез досега не ги коментирала.

Ноа не застанува тука. Тој тврди дека и обновениот брак на Џенифер Лопез со Бен Афлек во 2022 година бил внимателно осмислен маркетиншки потег, чија цел била повторно да го сврти вниманието на јавноста кон неа. Според него, целата приказна била повеќе ПР-кампања отколку вистинска љубовна романса.

Џенифер Лопез и Бен Афлек повторно се венчаа во 2022 година, две децении по нивната прва свршувачка, но нивниот втор брак не траеше долго. Тие се разделија во 2024 година, што повторно ги поттикна шпекулациите за нивната врска. Сепак, ниту Лопез ниту Афлек никогаш не потврдиле дека нивниот брак бил организиран од маркетиншки причини.

Ова не е првпат Ојани Ноа јавно да ја критикува поранешната сопруга. Во изминатите години тие водеа и судски спорови околу обидите на Ноа да објави снимки и материјали од нивниот заеднички живот, што судовите му го забранија. И покрај тоа што од нивниот развод поминаа речиси три децении, конфликтот меѓу нив очигледно сè уште не е завршен.