ЕВРОПА МОРА 10 ПАТИ ДА ГО ЗГОЛЕМИ ВЛОГОТ ВО КРИТИЧНИ СУРОВИНИ Европската инвестициска банка предупредува дека малку се отвораат рудници

Европската Унија мора да ги зголеми инвестициите во истражувањето на критични суровини десеткратно, од сегашните 200 милиони евра на околу 2 милијарди евра годишно, со цел да ги исполни целите на Законот за критични суровини до 2030 година, открива новата студија на Европската инвестициска банка (ЕИБ), соопшти банката.

Според законот, до 2030 година, најмалку 10% од годишната потрошувачка на стратешки суровини во ЕУ ќе доаѓа од домашно производство, но банката предупредува на јазот помеѓу политичките цели и реалните можности.

Според студијата, Европа има значаен, но недоволно искористен потенцијал за производство на критични суровини, бидејќи децениите недоволно инвестирање го оставија континентот со премалку истражувачки проекти за да прерасне во нови рудници.

Проблемот е што истражувањето на минерали е најризичниот дел од рударскиот синџир, а студијата наведува дека само еден од 10.000 почетни истражувачки проекти и околу еден од 1.000 напредни проекти на крајот прераснуваат во активен рудник.

ЕИБ наведува дека пречките не се само од финансиска природа, туку и сложени и различни процедури за издавање дозволи во земјите-членки, долго време на чекање за одобренија, недоволен квалитет на геолошки податоци, слаба јавна поддршка за рударски проекти и мал број компании кои се подготвени да преземат ризици во раните фази на истражување.

Банката препорачува поедноставни и попредвидливи процедури, подобро геолошко мапирање, финансиски стимулации за ризични стартап проекти и поголема поддршка за иновации.

Банката гледа особен потенцијал во употребата на нови технологии, вклучувајќи вештачка интелигенција, сателитско снимање и напредно геолошко моделирање, како и во екстракцијата на критични суровини од стар рударски отпад.

Побарувачката за критични суровини расте поради развојот на електрични возила, батерии, обновливи извори на енергија и дигитална инфраструктура.

Европската Унија сака да ја намали својата зависност од увоз, особено од Кина, која во моментов доминира во преработката на многу клучни минерали.