ИРАН ЈА ПРЕДУПРЕДИ БУГАРИЈА ЗА АВИОНИТЕ ТАНКЕРИ НА ГОРИВО НА САД Земјата ги отфрли сугестиите дека ќе се користат за напади врз Иран

Итан испрати директно предупредување до Бугарија поради најавеното распоредување на американски воени авиони на нејзина територија. Техеран ѝ порача на Софија дека не смее да дозволи Бугарија да стане база за операции против Иран, пишува „Еуроњуз“.

Предупредувањето се однесува на предлогот на бугарската влада привремено да смести до осум американски авиони-танкери за полнење гориво во воздухопловната база Безмер на југоистокот од земјата.

Портпаролот на иранското Министерство за надворешни работи, Есмаил Багаеи, изјави дека секоја поддршка за американските напади би значело дека Бугарија станува соучесник во она што тој го нарече „агресија и воени злосторства“.

Ова не е прв пат Техеран да испрати таква порака. Во април, Иран испрати дипломатска нота до Софија со која ја предупреди Бугарија да не дозволува американските воени авиони да ги користат бугарските аеродроми за операции против Иран.

Бугарија и САД ги отфрлија тврдењата на Иран и нагласуваат дека распоредувањето на авионот KC-135 е од чисто одбранбен карактер и не е поврзано со воени операции на Блискиот Исток. Европската команда на американската армија објави дека внимателно ја следат ситуацијата и дека се подготвени да одговорат на сите закани.

„САД одржуваат регионални одбранбени капацитети на источното крило на НАТО, вклучувајќи ја и Бугарија, и тесно соработуваат со бугарската влада и нашите сојузници и партнери низ целиот регион. Остануваме будни и подготвени да се спротивставиме на сите потенцијални закани“, се вели во нивното соопштение.

Бугарското Министерство за надворешни работи, исто така, остро ги отфрли сугестиите дека земјата може да се користи за напади врз Иран.

„Нема прашање за спроведување какви било воени операции на Блискиот Исток од бугарска територија“, соопшти министерството.

Бугарската влада додаде дека не презема непријателски чекори кон Техеран. Таа ги повика Иран и САД да ги прекинат воените активности и да се вратат на преговорите за траен прекин на огнот.

Американските авиони претходно беа стационирани на аеродромот во Софија. На крајот на јуни, од нив беше побарано да бидат преместени од тој цивилен објект, а по повеќекратните американски барања, бугарската влада ја предложи воената база Безмер како нова локација.

Станува збор за авиони за полнење гориво во воздух, кои им овозможуваат на ловците и другите воени авиони да останат подолго во воздух снабдувајќи ги со гориво за време на летот. Целата ситуација се одвива во контекст на обновени тензии меѓу Вашингтон и Техеран откако пропадна договорот за привремено прекин на огнот.