ТРАМП ПРОГЛАСИ КРАЈ НА ПРИМИРЈЕТО СО ИРАН По нападите Техеран побарал средби, САД се согласиле
Американскиот претседател објави дека САД се согласиле да продолжат со дипломатските контакти со Иран, но порача дека прекинот на огнот повеќе не важи. Во меѓувреме, катарски посредници отпатувале во Техеран.
Само неколку дена по новата размена на напади меѓу САД и Иран, Доналд Трамп објави дека Техеран побарал продолжување на преговорите, а Вашингтон ја прифатил понудата.
Но американскиот претседател истовремено испрати далеку поостра порака.
„Исламската Република Иран побара да продолжи со преговорите. Ние се согласивме на тоа. Но САД им ставија до знаење дека прекинот на огнот е завршен“, напиша Трамп на својата социјална мрежа „Трут Соушл“.
Изјавата доаѓа во момент кога регионот сè уште ги чувствува последиците од последната ескалација во Ормутскиот теснец, каде што Техеран беше обвинет за напади врз бродови, по што следуваа американски воздушни удари врз цели во Иран.
Катар повторно ја игра улогата на посредник
Според дипломатски извори за Си-Ен-Ен, катарски преговарачи, во координација со САД, веќе отпатувале во Иран на разговори со иранските власти.
Ова укажува дека, и покрај жестоката реторика и воените операции, дипломатскиот канал меѓу двете страни останува отворен.
Американски функционер за Си-Ен-Ен објаснил дека стратегијата на администрацијата на Трамп била прво да изврши воен притисок, а потоа привремено да ги запре операциите за да се избегне поширока ескалација и да се создаде простор за преговори.
Мир преку притисок?
Пораката од Вашингтон остава впечаток дека Белата куќа сака истовремено да ги користи и дипломатијата и военото одвраќање.
Додека Иран бара враќање на преговарачката маса, Трамп јасно става до знаење дека САД немаат намера повторно да се повикуваат на прекинот на огнот што претходно го прогласија за завршен.