ГЛОБАЛНИТЕ ЦЕНИ НА ХРАНАТА ЗА ЕДНА ГОДИНА ПОРАСНАА ЗА 2,9% Цените на житарките скокнаа за 7,8%

Референтната мерка за светските цени на прехранбените производи остана генерално стабилна во мај, бидејќи намалувањето на котациите на растителното масло ги компензира зголемувањата на оние за житарки и шеќер, според новите податоци објавени во петок од Организацијата за храна и земјоделство на Обединетите нации (ФАО).

Индексот на цените на храната на ФАО, кој ги следи месечните промени во меѓународните цени на кошничка со глобално тргувани прехранбени производи, во просек изнесуваше 130,8 поени во мај 2026 година, што е намалување за 0,25 од ревидираното априлско ниво и 2,9% повисоко од нивото од претходната година.

– Додека глобалните пазари на прехранбени производи останаа генерално отпорни, зголемувањето на цените на житарките ја нагласува ранливоста на ризиците поврзани со временските услови и нарушувањата на пазарите на енергија и влезни материјали. Континуираната неизвесност што влијае на клучните трговски патишта, вклучувајќи го и Ормускиот теснец, може да ја намали употребата на ѓубрива и да изврши дополнителен притисок врз цените на храната, истакнувајќи ја потребата од координирана меѓународна акција – изјави Бубакер Бен-Белхасен, директор на одделот за пазари и трговија на ФАО.

Светските цени на пченицата во мај во однос на април се зголемија за 3,4% и за 7,8% во однос на 2025 година – поддржани од помалите очекувани жетви кај главните извозници, вклучувајќи ги и САД каде што условите за жетва на зимска пченица се меѓу најнеповолните во последните децении. Цените на тврдата црвена зимска пченица во САД во мај 2026 година беа за 28 проценти повисоки отколку во мај 2025 година.

Цените на пченката се зголемија за 1,9% во однос на претходниот месец и за 3,9% годишно – врз основа на поголемата побарувачка за увоз на клучните пазари, помалата достапност во Бразил и САД и повисоките цени на енергијата што ја зголемија побарувачката поврзана со етанол.

Оризот поскапи за 2,7% во однос на претходниот месец, бидејќи временските услови и повисоките цени на суровата нафта и добиените производи ги поткрепија котациите во некои водечки азиски земји извознички.

За прв пат од почетокот на годинава цените на растителното масло се намалија и тоа за 4,6%. Меѓународните цени на палминото масло се намалија поради очекувањата за послаба глобална побарувачка за увоз и неизвесност на пазарите на сурова нафта, додека трендовите на светските цени на соиното масло беа мешани, при што сезонските зголемувања на извозните залихи ги намалија цените во Јужна Америка, дури и додека цврстата побарувачка за биогорива ги поддржуваше вредностите во Северна Америка. Цените на маслото од репка и сончогледовото масло се зголемија поради тесните услови на снабдување.

Глобалните цени на месото се зголемија цо мај во однос на април  за 0,1%. Кај цените на говедското месо тоа е поради силната побарувачка за увоз, особено од Кина и Соединетите Американски Држави, додека цените на свинското месо се намалија, главно поради пониските цени во Европската Унија поради изобилството на залихи и намалената побарувачка за увоз.

За половина процентен поен  во мај се намалија цените на млечните производи, што се должи на меѓународните цени на путерот. Цените на сирењето беа претежно стабилни, додека цените на обезмастеното млеко во прав се зголемија. Цените на полномасното млеко во прав покажаа мешани движења.

Во мај цените на шеќерот пораснаа за 7,5% што беше поттикнато од податоците што укажуваат на помал удел од производството на шеќерна трска во Бразил што се распределува за производство на шеќер, зголемувајќи ги очекувањата за поголемо пренасочување кон етанол, како и загриженоста дека условите на Ел Нињо би можеле негативно да влијаат на производството во Индија и Тајланд во наредната година.