ИРАН НЕМА ДА ПРЕГОВАРА СО САД Порака од иранскиот Врховен совет за безбедност

Секретарот на иранскиот Врховен совет за национална безбедност Али Лариџани денеска изјави дека Техеран нема да преговара со САД. По информациите во западните медиуми во врска со барањето на Техеран за преговори со Вашингтон, Лариџани нагласи дека Иран нема да преговара со САД, пренесува Тасним.

Лариџани изјави дека американскиот претседател Доналд Трамп го турнал регионот на Блискиот Исток во хаос со своите „фантазии и заблуди“ и дека „сега се плаши од поголеми жртви меѓу американските војници“.

„Преку своите заблудни постапки, тој го претвори својот слоган „Америка на прво место“ во „Израел на прво место“ и ги жртвуваше американските војници за амбициите на гладниот за моќ Израел“, напиша Лариџани во објава на платформа Икс.

Тој рече дека Трамп „со нови лаги повторно ја наметнува цената на својот култ на личност врз американските војници и семејства“.

„Денеска, иранската нација се брани. Иранските вооружени сили не започнаа инвазија“, рече Лариџани.

Трамп вчера изјави дека од почетокот на нападот врз Иран, на 28 февруари, се погодени стотици цели во таа земја, а девет ирански бродови се уништени.

Во шестминутно видео објавено на неговата социјална мрежа Truth Social, американскиот претседател изјави дека мисијата ќе продолжи сè додека не се исполнат сите американски цели.

Тој исто така рече дека членовите на Иранската револуционерна гарда кои ќе го положат оружјето ќе добијат „целосен имунитет“, додека оние кои ќе одбијат ќе „се соочат со сигурна смрт“.

Обраќајќи се до иранскиот народ, Трамп повторно ги повика да го искористат овој момент, додавајќи дека го одржал своето ветување да им помогне и повтори дека на Иран не смее да му се дозволи да има можност да развива ракети со долг дострел или нуклеарно оружје.

САД и Израел започнаа напади врз Иран во сабота наутро во време кога беа во тек индиректни нуклеарни разговори меѓу Техеран и Вашингтон, со посредство на Оман.