БРИТАНСКАТА ВОЕНА БАЗА НА КИПАР НАПАДНАТА СО ДРОН Нема жртви ниту повредени

Британската воздухопловна база на РАФ во Акротири на Кипар беше погодена во сомнителен напад со беспилотни летала, потврди британското Министерство за одбрана. Инцидентот се случил околу полноќ по локално време во базата во близина на Лимасол.

Според официјалните информации, немало жртви или повредени. Министерството за одбрана изјави дека станува збор за „сомнителен напад со беспилотни летала“ и дека силите на терен реагирале за да го заштитат персоналот. Безбедносните мерки се подигнати на највисоко ниво, а дел од персоналот кој не е од суштинско значење за операциите ќе биде привремено преместен.

Британските власти сè уште не потврдија од каде е лансиран дронот. Според информациите од Скај њуз, станува збор за помал дрон, а кипарските власти наведуваат дека е предизвикана ограничена штета.

Кипарскиот претседател Никос Христодулидес рече дека властите се во целосна готовност, но нагласи дека Кипар „не учествува на никаков начин и нема намера да учествува во никаква воена операција“.

Инцидентот се случи неколку часа откако британскиот премиер Кир Стармер потврди дека Обединетото Кралство им дозволило на САД да користат одредени британски бази за напад врз ирански ракетни цели.

Според медиумските извештаи, станува збор за базите на RAF Ферфорд во Глостершир, Акротири на Кипар и Диего Гарсија на островите Чагос.

Британското Министерство за одбрана претходно објави дека дополнителни одбранбени системи, вклучувајќи системи против беспилотни летала, борбени авиони Ф-35 и радарски системи, се преместени на Кипар за чисто одбранбени цели.

Конфликтот на Блискиот Исток влегува во својот трет ден, а се проценува дека повеќе од 200.000 британски граѓани, вклучувајќи воен персонал, се изложени на ризик во земјите од Персискиот Залив.