НА ТРАМП МУ СЕ СЛЕВААТ МИЛИОНИ И ОД ДРЖАВНИ НАСТАНИ На сметките на неговите луксузни имоти, САД уплатиле најмалку 1,3 милиони долари
Поради ограничената транспарентност, предупредуваат аналитичарите, јавноста веројатно никогаш нема да има целосен увид во износите што компаниите на Трамп ги заработиле за време на неговиот мандат во Белата куќа.
Американскиот претседател Доналд Трамп сè повеќе ги користи своите луксузни одморалишта и голф клубови како место за политички состаноци, собирање средства и неформални дискусии со политички сојузници и групи на интереси, покажува извештајот на политичка група за надзор „Граѓани за одговорност и етика“ во Вашингтон (CREW), објави „Гардијан“,
Според нивните податоци, избраните функционери од САД и од странство ги посетиле имотите на Трамп најмалку 145 пати од неговата инаугурација минатата година. Според извештајот странски владини претставници ги посетиле имотите на Трамп 55 пати, а групи со посебни интереси одржаа 57 настани во текот на 2025 година.
Анализа на извештаите за финансирање на кампањата покажува дека политичките организации и комитети потрошиле најмалку 1,3 милиони долари на тие локации во 2025 година.
Најважниот политички центар стана клубот Мар-а-Лаго во Флорида, а самиот Трамп го опиша како место „најблиску до рајот“. Донаторски вечери, политички настани и состаноци со функционери редовно се одржуваат таму, а членарината порасна од 100.000 на еден милион долари во последните неколку години, што само ја нагласува ексклузивноста на пристапот.
Републиканскиот национален комитет и Maga Inc. се меѓу најголемите трошачи со речиси 1 милион долари за десетици настани одржани таму во 2025 година.
Во извештајот се наведени и голем број настани организирани од корпорации и групи на интереси на локациите на Трамп, вклучувајќи голф турнири и деловни состаноци. Меѓу посетителите беа странски претставници, на пример израелски претставници, но и аргентинскиот претседател Хавиер Мајли, кој престојуваше таму неколку пати.
Критичарите тврдат дека таквата практика им овозможува на донаторите и групите на интереси потенцијално да обезбедат политичко влијание во Белата куќа со плаќање на приватните компании на Трамп.
-Трамп ги претвори своите имоти во продолжение на администрацијата – вели Вокер Дејвис од CREW.
Тој додава дека нивното промовирање испраќа сигнал дека посетата на неговите деловни проекти е пожелна за оние кои бараат политички пристап.
Белата куќа ги отфрла обвинувањата за конфликт на интереси, истакнувајќи дека средствата на Трамп формално се во фонд управуван од неговите деца и дека тој дејствува исклучиво во интерес на американските граѓани.
Поради ограничената транспарентност, предупредуваат аналитичарите, јавноста веројатно никогаш нема да има целосен увид во износите што компаниите на Трамп ги заработиле за време на неговиот мандат во Белата куќа.
Некои правни експерти веруваат дека таквата практика би можела да отвори прашања поради можното кршење на правилата за судир на интереси и уставните одредби што го ограничуваат добивањето бенефиции од домашни и странски актери, иако претседателот во голема мера е заштитен со имунитет за време на неговиот мандат.