СИТУАЦИЈА СО ВОДОСТОИТЕ Е ПОД КОНТРОЛА, НО НЕ Е БЕЗ РИЗИК Евикуирани семејства во Кичево, аларм во Пелагонија и во Куманово

Центарот за управување со кризи (ЦУК) информира дека поради врнежите од дожд и снег во изминатите 24 часа, на повеќе локации низ земјава е забележано зголемување на водостоите на реките. Надлежните служби постапуваат континуирано за да се намали ризикот од излевање и штети на населението.

– Состојбата се следи 24/7 и сите теренски служби се подготвени да интервенираат, а граѓаните да бидат информирани за евакуација ако е потребно – велат од ЦУК.

Кумановски регион

На подрачјето на општините Куманово, Липково и Старо Нагоричане водостоите се зголемени, но засега нема опасност од излевање.

Во Општина Кратово, поради повремени врнежи од дожд, е забележано зголемување на нивото на Кратовска и Крива Река, но без непосредна закана за поплави.

– Следиме и на оваа локација, но засега нема потреба од аларм, се обезбедуваат превентивни мерки – велат од ЦУК.

Пелагониски регион

Во Битола е регистриран одрон на магистралниот пат Е-65, за што е известено ЈП „Македонија пат“. Дополнително, забележано е излевање на Сива Река во близина на локалитетот Хераклеа, за што е известено ЈП „Нискоградба“.

Во општините Новаци и Демир Хисар, водостојот на реката Црна е значително зголемен, со 280 см измерено во Новаци, но без директна закана за населението.

– Ситуацијата се следи постојано и тимовите на терен се подготвени да интервенираат ако водостоите продолжат да растат – велат од ЦУК.

Охридско-кичевски регион

Најтешка е состојбата во Кичево, каде се евидентирани 250 евакуирани лица, односно 63 семејства. На нив им се обезбедува храна, вода и неопходна поддршка.

Екипи на комуналните служби работат на расчистување и продлабочување на коритото на Зајашка Река, како и на чистење на канализационата мрежа. Пожарно-приклучни и спасувачки екипи вршат испумпување на вода од подруми по пријави од жителите.

– Нашата приоритетна цел е да се заштити населението и да се намали штетата. Граѓаните треба да ги следат инструкциите од локалните власти и да бидат подготвени на евакуација доколку се зголеми ризикот – истакнуваат од ЦУК.

Препораки и повик до граѓаните

Центарот за управување со кризи апелира до сите граѓани да ги почитуваат сообраќајните знаци и предупредувања на локалните власти, да не се приближуваат до водостоите на реките и да ги заштитат своите домови со превентивни мерки.

– Сите теренски служби се на висина на задача, но граѓаните се дел од заштитата. Секој треба да биде внимателен и да реагира навреме – додаваат од ЦУК.