ЕВАКУИРАНИ ОКОЛУ 100 ЖИТЕЛИ НА КИЧЕВО Се излеа реката Далјан и поплави повеќе куќи

Евакуирани се околу 100 лица во Кичево, поради поплави. Тие се сместени во спортската сала „Христо Узунов“, и обезбедени им се храна, вода, кревети, душеци и ќебиња.

Во Општина Кичево, на улицата Прилепска, поплавени се повеќе станбени објекти. На терен интервенираа екипи на Црвен крст, ДЗС, РЦУК Кичево, ТППЕ Кичево, ЈП Комуналец и Општина Кичево.

Регистрирани се и излевања на Зајашка река во реонот над стадионот „Влазрими“ и новото училиште „Санде Штерјоски“, како и излевање на реката Треска на земјоделско земјиште во атарите на селата Бигор Доленци, Вранешти и околината.

Тешко прооден патот помеѓу селата Форино и Тумчевиште

Поради обилните врнежи од дожд, локалниот пат помеѓу селата Форино и Тумчевиште, Општина Гостивар, е тешко прооден.

Забележано е излевање на Лакавичка река во селото Мало Турчане и на Сушечка река во селото Горна Бањица, Општина Гостивар. За настаните се известени надлежните институции и службите за итно дејствување, кои ја следат состојбата на терен.

Се излеа реката Далјан во Охрид

Во Општина Охрид евидентирани се поплавени подруми, гаражи и дворови на повеќе локации во градот. Локалната самоуправа и Кризниот штаб на Општина Охрид се известени и постапуваат по пријавите. Реката Далјан е излеана од коритото на повеќе места, при што се поплавени голем број куќи, а службите за итно дејствување се организирани и се на терен.

Поради обилните врнежи од дожд е забележано зголемување на водостојот на реките и излевање на повеќе водотеци, при што се поплавени голем број куќи и дворни места.

За во 9 часот утрово беше закажан состанок на Кризниот штаб на Општина Битола, со цел утврдување приоритети и координација на активностите на терен.