ДAЛИ ЗНАЕВТЕ ДЕКА МЕЛАНИЈА ТРАМП ИМА БРАТ? Денис Цигелњак е вонбрачен син на таткото на првата дама на САД

Меланија Трамп деновиве ќе одбележи една година откако повторно стана прва дама на Соединетите Американски Држави, па по тој повод да се потсетиме на нејзиното семејство.

Меланија потекнува од Словенија и од детството е блиска со својата сестра Инес, која ѝ била и кума на нејзината венчавка во 2005 година. Сепак, многумина не знаат дека 55-годишната Меланија има и постар брат, со кого никогаш не е снимена.

Се вика Денис Цигелњак, роден е во 1965 година и живее во словенечкиот град Храстник. Неговата мајка, Марија Цигелњак, забременила од Виктор Кнавс, таткото на Меланија, и била разочарана кога тој ја замолил да абортира откако му кажала дека е бремена.

– Мајка ми не се согласила, сакала да ме задржи. Не сакала ништо од него бидејќи била многу разочарана од раскинувањето на нивната врска – изјавил 60-годишниот Цигелњак за Planet.si, додавајќи дека неговата баба се обидела да ја убеди да побара алиментација од Кнавс.

– Таткото на мајка ми беше тој што ме издржуваше 18 години бидејќи мојот татко постојано забораваше да плати, дури и кога судот го потсетуваше на тоа – рекол тој.

Новинарката која прва открила дека Меланија Трамп има полубрат со кого нема никаков контакт, пронашла судски документи што ја документираат правната битка меѓу Кнавс и неговата поранешна девојка Марија Цигелњак, која забременила со нивниот син. Кнавс го оспорил татковството и ја тужел Цигелњак на суд, а крвен тест на крајот утврдил дека тој е таткото.

Дури и самата Меланија се обиде да го негира постоењето на Цигелњак, но подоцна ја промени својата приказна, обидувајќи се да ја префрли вината на новинарката на GQ, велејќи дека погрешно ја разбрала.

Кратко откако нејзината приказна беше објавена во списанието, Трамп се обиде да фрли сомнеж врз статијата преку социјалните мрежи.

– Има бројни неточности во оваа статија, вклучувајќи одредени изјави за моето семејство и наводи за лични работи – напишала таа на Фејсбук во тоа време. И покрај фактот дека тие никогаш не разговарале, Цигелњак, кој има ќерка со својата партнерка, рекол дека би сакал да излезе на пијалак или на пица со својот татко и сестрите доколку има можност.

За потсетување, патот на Меланија Трамп до Белата куќа беше поплочен со амбиција и дисциплина, особини кои, како што самата таа постојано нагласува, ги наследила од своите родители, Виктор и Амалија Кнавс. Нејзиниот татко, Виктор Кнавс, роден на 24 март 1944 година во Радече, бил истакната личност во нивната локална заедница во тогашната Социјалистичка Република Словенија.

Тој ја започнал својата кариера како возач за градоначалникот на блискиот град, а подоцна го возел директорот на државната текстилна фабрика Јутрањка.

Според „Њујорк тајмс“, тој бил член на Комунистичката партија на Севница, што било вообичаен пат кон напредување во тоа време. Подоцна се префрлил во продажба, работејќи како продавач на автомобили за државна компанија, и на крајот отворил своја продавница за автоделови и велосипеди, покажувајќи претприемачки дух што подоцна ќе го препознае кај својот зет, Доналд Трамп.

Семејството Кнавс живеело скромно, но снаодливоста на Виктор им обезбедила натпросечен животен стандард. Со неговата сопруга Амалија, која работела како изработувач на шаблони во истата фабрика, Јутрањка, тој имал две ќерки, постарата Инес и помладата Меланија, родена во 1970 година.

Семејството се преселило од стан во Севница во куќа во една од подобрите населби, а на нивните ќерки им било овозможено да одат на одмор во Франција, Италија и Германија. Скромната и елегантна Амалија им всадила на своите ќерки љубов кон модата и убавината, додека Виктор бил оној што ги охрабрувал да се стремат кон деловен успех и да патуваат.

Меланија подоцна го опишала својот татко како одличен работник и ја споредила неговата деловна остроумност со онаа на Доналд Трамп, велејќи дека двајцата делат „исти вредности и иста традиција“ и покрај тоа што пораснале во сосема различни светови.

Патувањето на Меланија во светот на модата започнало токму под влијание на нејзината мајка. Амалија, секогаш дотерана, организирала нејзината ќерка да учествува на модни ревии за детска облека произведена од фабриката Јутрањка.

Пресвртот се случи кога Меланија, тогаш седумнаесетгодишна, била забележана во Љубљана од познатиот словенечки фотограф Стане Јерко. Таа средба ја лансирала во светот на манекенството.

Набргу потоа, на осумнаесетгодишна возраст, таа потпишала договор со модна агенција во Милано. Ги напуштила студиите за дизајн и архитектура на Универзитетот во Љубљана по првата година за да продолжи кариера во манекенството. Работела во Париз и други европски модни престолнини, а нејзиното лице ги красеше насловните страници на бројни списанија.