СДСМ САКААТ ДА МЕ ВОВЛЕЧАТ ВО СКАНДАЛ, БАРАМ ИЗВИНУВАЊЕ Арсовски остро ги демантира наводите за поврзаност со сопственикот на „Дигитал оне“

Димче Арсовски, член на раководството на ВМРО-ДПМНЕ, остро ги демантира наводите дека бил во некаква поврзаност со лицето Кристијан Арсовски, за кое СДСМ денеска на прес-конференција обвини дека било вмешано во спорен милионски тендер преку фирмата „Дигитал оне“, која наводно има само двајца вработени.

Димче Арсовски ги нарече лаги обвинувањата на СДСМ.

„Денеска СДСМ повторно покажа и докажа дека влијанието од заевизмот и многуте лиценци поделени за одгледување марихуана, сè уште владеат во СДСМ.

Некое момче во залез на кариера после сериозен пораз на избори, нарекувајќи се втор човек во партијата, јавно се обидел да ме поврзе со некаков си тендер од неколку милиони евра, само и само затоа што сопственикот носел исто презиме како моето.

За да биде детално јасно, ниту го познавам човекот кој е сопственик на фирмата, ниту сум го сретнал, ниту знам како изгледа, ниту ми е роднина по било која основа. Единствено што е исто е презимето. Немам никаква врска со никаков тендер, ниту пак сум имал било каква врска со државни тендери.

Иако во прашална форма, моето име и презиме беше споменато на пресот на СДСМ, тенденциозно со намера да ме вовлечат во нивни креатури и да ги манипулираат граѓаните и јавноста, па затоа јавно барам извинување од СДСМ, ако им остана малце достоинство.

За разлика од нив, секој мој прес каде што било изнесено било што како информација, било точно и потврдено, а не како нивниве лаги и измислици. Знам дека сè  уште ги боли што ја изнесував секојдневно вистината за нивниот криминал.

Избори и доверба кај народот не се добиваат со тоа што ќе измислувате непостоечки случаеви и интриги за луѓе од ВМРО-ДПМНЕ, туку со напорна работа, реформи и програма.

Така победува ВМРО-ДПМНЕ на изборите, со чесно и домаќинско работење, а криминал доколку некаде има, институциите си ја вршат работата и тоа се гледа“, вели Арсовски.