ПЕНЗИОНЕРКА МУ УПЛАТИЛА 100.000 ДОЛАРИ НА „БРЕД ПИТ“, ОТИШЛА ВО АМЕРИКА И ГО ЧЕКАЛА ВО ХОТЕЛ 3 НЕДЕЛИ Уште една жена од Европа наседнала на софистицирана измама

Актерот Бред Пит се најде во центарот на уште една онлајн измама. Пензионерка од Швајцарија, која се претставила како Патриција, изгубила повеќе од 100.000 долари затоа што верувала дека е во врска со актерот. Патриција дури и одлетала за САД, каде што поминала три недели сама во хотелска соба, чекајќи Пит да се појави.

Пензионерката со месеци била убедена дека се заљубила во вистинскиот Бред. Сепак, се покажа дека станала цел на онлајн измамник кој се претставил како славниот актер и ги потрошил нејзините заштеди.

Сè започнало во мај 2024 година откако почнала да го следи Бред на Инстаграм. Набрзо добила порака од некој кој се претставил како негов менаџер. Лажниот менаџер ја прашал дали сака да разговара со Бред, на што таа се согласила.

– Почнавме нормално да комуницираме, како двајца луѓе кои се запознаваат, многу нежно – рекла таа, пишува Дејли Меил.

Со текот на времето, нивните пораки станале почести, а потоа мажот почнал да ја изјавува својата љубов кон неа.

– Ми поставуваше многу прашања за тоа како се чувствувам, за тоа кои работи ми се допаѓаат, како го гледам животот, а потоа еден ден ми дава до знаење дека е вљубен во мене – рекла Патриција.

Измамникот, исто така, ја замолил да ја чува нивната „романса“ во тајност.

„Бред“ ѝ испраќал пораки како: Љубов моја, ти си сега моето сè засекогаш.

Патриција верувала во сè што тој кажувал.

– Ова е вистинска врска што се развива, па му се предавам на ова чувство на љубов – помислила таа. Сепак, ситуацијата ескалирала откако почнале да зборуваат за лична средба.

Измамникот тврдел дека му требаат пари за да се сретнат.

– Душо, мојот менаџмент бара 50.000 долари – напишал тој во една порака, додавајќи дека тоа е стандардна цена за секој што сакал да помине време со него. На почетокот, Патриша одбила, но потоа се убедила себеси дека тоа може да биде легитимно.

– Помислив: „Па, можеби така функционираат работите. Никогаш порано не сум била во контакт со актер – рекла пензионерката, која му испратила на измамникот прво 30.000 долари, а потоа и преостанатите 20.000 долари.

Некое време подоцна, вистинскиот Бред се појави на Филмскиот фестивал во Венеција, а Патриша се надеваше дека конечно ќе го запознае. Спакувала мал куфер и чекала инструкции да му се придружи.

Сепак, тој никогаш не ја повикал. Наместо тоа, лажниот Бред ѝ испратил цвеќе и порака во која пишувало: „Те сакам толку многу, душо, едвај чекам да го поминам остатокот од мојот живот со тебе. Пит.“

Откако му платила 50.000 долари, ѝ било потешко да се откаже од врската. Измамникот побарал уште 10.000 долари за наводни медицински трошоци, а потоа уште 10.000 долари.

Патриша, вели таа, била преплавена од стрес, но продолжила да му плаќа затоа што верувала дека ја сака. По новите плаќања, таа предложила да се сретнат во САД, резервирала лет и била убедена дека конечно ќе го запознае својот партнер.

Сепак, завршила три недели сама во хотел, пиејќи коктели додека го чекала.

Никогаш не го запознала својот партнер и на крајот му испратила уште 20.000 долари пред да се врати дома. Кога се вратила во Швајцарија, ја прочитала приказната за Французинката која изгуби 830.000 евра од измамник кој се преправаше дека е Бред.

Дури тогаш ја сфатила вистината, откако ги видела сличностите во нивните приказни. Патриција отишла во полиција за да поднесе формална жалба.

– Кога пристигнав, реков: „Мислам дека сум измамена“, не можев ниту да го изговорам името на Бред – вели таа.

Пензионерката сега се обидува да го обнови својот живот, но вели дека емоционалната штета е огромна.

– Неопислива штета е. Поминав една година во врска што не постоеше. Се прашувате: „Како можеа да ме искористат на тој начин?“ – вели Патриција.

Порано оваа година, жена во Франција, Ан Денешател, беше измамена од измамник кој се претставуваше како познатиот актер. Измамникот користеше лажен профил на социјалните мрежи и фотографии генерирани од вештачка интелигенција за да ја убеди жената дека на Пит му требаат пари за лекување на рак на бубрезите.

Ан прво добила порака од некој кој се претставил како Џејн Ета Пит, мајката на Бред. Лажната Џејн ѝ кажала дека е совршена жена за нејзиниот син, а потоа почнала да добива пораки од „актерот“ кои ги создала вештачката интелигенција. Во исто време, Ан била во процес на развод од својот поранешен сопруг.

Во емисијата „Sept à Huit“, таа објасни дека измамникот ја изјавувал својата љубов кон неа и ја запросил. Тој, исто така, ѝ праќал луксузни подароци, но ја натерал да плати царински давачки. За еден предмет морала да потроши 9.000 евра.

Ан, исто така, добила фотографии на кои Бред е во болнички кревет. На една од нив, тој држел парче хартија на кое пишувало: „Те сакам, Ан“. Друга го покажувала како го прегледуваат лекари. Сите фотографии биле генерирани од вештачка интелигенција, што Ан на почетокот не го знаела. Измамникот дури ѝ испратил и лажна електронска адреса од лекар, во кој се вели дека актерот се бори за својот живот.

Изговорот што ѝ го дал на Ан бил дека не може да пристапи до средствата бидејќи поранешната сопруга на Бред во реалниот живот – Анџелина Џоли – му ја замрзнала банкарската сметка.

Французинката им верувала на неговите лаги и сфатила дека била измамена дури кога вистинскиот Бред бил фотографиран со неговата партнерка Инес де Рамон.

– Се прашувам зошто ме избрале мене и ми нанесоа толку многу штета. Никогаш не сум повредила никого. Овие луѓе заслужуваат пекол – рекла таа.