ОБВИНЕТИТЕ ЌЕ СЕ ИЗЈАСНАТ ДАЛИ ЧУВСТВУВААТ ВИНА ИЛИ НЕ Продолжува судењето за трагичниот пожар во кочанската дискотека „Пулс“

Во Судскиот комплекс во Идризово денеска продолжува судскиот процес за катастрофалниот пожар во дискотеката „Пулс“ во Кочани, каде што на 16 март 2025 година загинаа 63 лица, меѓу кои и деца, а повеќе од 200 беа повредени.

На денешното рочиште се очекува обвинетите да се произнесат за виновност, по што ќе следуваат воведните зборови на одбраната.

На минатото рочиште, обвинителството својот воведен говор го презентираше обвинението. Јавниот обвинител Борче Јанев истакна дека се бара одговорност „по име и презиме“ за сите кои дозволиле „Пулс“ да функционира како „смртоносна стапица“. Според него, катастрофата не е резултат само на активираната пиротехника, туку на долгогодишен институционален молк, игнорирана опасност и неказнивост.

Со обвинението се опфатени 34 физички и три правни лица. Меѓу нив се сопственици на локали, поранешни градоначалници, инспектори, членови на обезбедување, управители и државни службеници. Тие се товарат за низа кривични дела поврзани со загрозување на јавната безбедност, незаконско работење и тешки последици по животот и здравјето.

Судењето се одвива под строги безбедносни протоколи. Во судницата присуствуваат обвинетите, семејства на настраданите, домашни и странски новинари, како и претставници на обвинителството и одбраната.

Процесот го води судијката Дијана Груевска Илиевска, која уште на првото рочиште најави дека нема да дозволи злоупотреби и непотребни одложувања, предупредувајќи дека сите страни мора да почитуваат дисциплина и рокови.