УКРАИНА ЌЕ КУПИ АМЕРИКАНСКО ОРУЖЈЕ ЗА 825 МИЛИОНИ ДОЛАРИ Стејт департментот одобри, се чека дозвола од Конгресот
Американските власти проценуваат дека оваа продажба ќе ги подобри безбедносните капацитети на Украина и ќе придонесе за нејзината способност да се соочи со сегашните и идните закани, како и да спроведува мисии за самоодбрана и регионална стабилност.
Американскиот Стејт департмент одобри можна продажба на воена опрема на Украина во вредност од околу 825 милиони долари, а потребната дозвола за оваа одлука е доставена до Конгресот на САД преку Агенцијата за соработка во одбраната и безбедноста –ДСЦА (DSCA).
„Владата на Украина побара да купи до 3.350 ракети ERAM (Extended Range Attack Munition) со продолжен дострел и ист број вградени GPS/INS системи со SAASM (Selective Availability Anti-Spoofing Module), Y-код или M-код“, се наведува во соопштението од агенцијата, која е дел од американското Министерство за одбрана.
Покрај тоа, предложениот пакет вклучува контејнери за ракети, држачи, резервни и заменски делови, потрошен материјал, опрема за поправка, софтвер за оружје, хардвер и софтвер за планирање мисии, како и обука на персонал, логистичка поддршка и инженерски услуги.
Американските власти проценуваат дека оваа продажба ќе ги подобри безбедносните капацитети на Украина и ќе придонесе за нејзината способност да се соочи со сегашните и идните закани, како и да спроведува мисии за самоодбрана и регионална стабилност.
Во соопштението се наведува дека Украина ќе користи пари од странски фондови обезбедени од Данска, Холандија и од Норвешка, како и пари од програмата за воена помош на САД.
„Продажбата нема да ја промени основната воена рамнотежа во регионот“, соопшти ДСЦА.
„Засега не е предложен никаков договор за компензација, а секој таков договор ќе биде дел од преговорите меѓу купувачот и изведувачот“, се наведува во соопштението.