„ПУТИН НЕ МОЖЕ ДА ГО ОДБИЕ ТРАМП“ Извор близок до Кремљ со ексклузивни информации за Ројтерс
Рускиот претседател Владимир Путин поставил строги услови за целосен прекин на огнот, но еден компромис би можел да биде фазен прекин на воздушната војна.
Извор близок до Кремљ изјавил дека Русија и САД изгледа веќе нашле заеднички јазик пред денешниот самит во Алјаска, објави Ројтерс.
– Очигледно, некои услови ќе бидат договорени утре бидејќи (Доналд) Трамп не може да се одбие, а ние не сме во позиција да одбиваме (поради притисокот од санкциите) – рекол изворот во четвртокот, а сакал да зборува под услов на анонимност поради чувствителноста на темата.
Рускиот претседател Владимир Путин поставил строги услови за целосен прекин на огнот, но еден компромис би можел да биде фазен прекин на воздушната војна, иако двете страни се обвинија меѓусебно за кршење на претходниот договор.
Аналитичарите велат дека Путин можеби ќе се обиде да направи да изгледа како да му го дава на Трамп она што го сака, а притоа да си остави простор да ја ескалира војната во Украина ако посака.
– Ако (Русите) можат да понудат договор што создава некакво примирје, но остава Русија да ги контролира ескалациските динамики, без вистинска одбрана на теренот или на украинското небо… тоа би бил одличен исход од гледна точка на Путин – вели директорот на програмата за демократска отпорност при Центарот за европски политички анализи, Сем Грин.
Американскиот претседател Доналд Трамп и рускиот лидер Владимир Путин денеска ќе одржат разговори на Алјаска, при што надежите на американскиот претседател за постигнување договор за прекин на огнот во Украина се неизвесни, но со последна понуда од Путин за можен нуклеарен договор кој би можел да им помогне на двајцата лидери да ја спасат својата репутација.
„Мислам дека Путин ќе направи договор за Украина“
Трамп, во пресрет на самитот, изјави дека мисли оти Путин ќе направи договор за Украина, но дека се колеба околу шансите за пробив. Путин, пак, ги пофали „искрените напори“ на САД да ја завршат војната.
Средбата на рускиот и на американскиот лидер на воздухопловна база од времето на Студената војна на Алјаска ќе биде нивниот прв разговор лице в лице откако Трамп се врати во Белата куќа, и доаѓа во услови на украински и европски стравувања дека Трамп би можел да ја „продаде“ Украина.
Белата куќа соопшти дека средбата ќе се одржи во 11 часот по локално време на Алјаска.
Трамп, кој некогаш тврдеше дека ќе ја заврши руската војна во Украина за 24 часа, во четвртокот изјави дека долгиот конфликт се покажал како потежок проблем одошто мислел. Тој рече дека, ако разговорите со Путин одат добро, организирањето на трилатерална средба со украинскиот претседател Володимир Зеленски – кој не е поканет на петочната средба – би било уште поважно од средбата со Путин.
Трамп притиска за примирје за да ја зацврсти својата слика на глобален мировник достоен за Нобелова награда за мир, нешто што, како што јасно ставил до знаење, му е важно.
Украина и Европа се охрабрени од ставот на Трамп
Украина и нејзините европски сојузници беа охрабрени по нивниот телефонски состанок во средата, на кој, според нив, Трамп се согласил дека Украина мора да биде вклучена во сите разговори за отстапување територии. Зеленски рече дека Трамп ја поддржал и идејата за безбедносни гаранции во поствоеното решение, иако американскиот претседател јавно не ја споменал таа точка.
Средбата во средата ги ублажи нивните стравови од можен договор меѓу Трамп и Путин кој би ја оставил Украина под притисок да направи територијални или други отстапки.
📽️ ЛАВРОВ ПРИСТИГНА НА АЛЈАСКА ВО БЛУЗОН „СССР“ Министерот е оптимист за преговорите Русија-САД
Путин, чијашто воена економија покажува знаци на слабеење, има потреба од Трамп за да ѝ помогне на Русија да излезе од стегите на сè построгите западни санкции или барем да не воведува нови санкции, што Трамп го има најавено.
Ден пред самитот, рускиот лидер ја понуди можноста за нешто што знае дека Трамп го сака – нов договор за контрола на нуклеарното оружје кој би го заменил последниот преостанат, што истекува во февруари следната година.
Трамп сугерира дека ќе бидат потребни територијални отстапки
Зеленски го обвини Путин дека блефира и дека купува време за да избегне секундарни американски санкции и нагласи дека отстапување на каква било територија е неприфатливо.
Трамп, пак, изјави дека територијални размени меѓу Русија и Украина би можеле да бидат можен начин за пробив.
Путин, чиишто сили контролираат речиси една петтина од Украина, сака Трамп да почне со оживување на намалените економски, политички и бизнис врски меѓу двете земји и, идеално, тоа да не зависи од напредок во решавањето на конфликтот во Украина.
Но, не е јасно дали Путин е подготвен за компромис околу Украина. По четврт век на власт, шефот на Кремљ го ставил својот политички капитал на тоа да излезе од војната со нешто што може да го претстави пред своите граѓани како победа.
Главна цел на неговата војна е целосна руска контрола врз индустрискиот регион Донбас во источна Украина, кој ги вклучува областите Доњецк и Луганск. И покрај постепените напредоци, околу 25% од Доњецката област сè уште е надвор од руска контрола.
Путин, исто така, сака целосна контрола врз областите Херсон и Запорожје; НАТО членството да биде тргнато од агендата за Киев; и ограничување на големината на украинските вооружени сили.
Украина порача дека овие услови се неприфатливи и дека се еднакви на барање за капитулација.
ИСТОРИСКА СРЕДБА КОЈА ЈА ЧЕКА ЦЕЛИОТ СВЕТ Трамп и Путин одлучуваат за Украина