ПУТИН ГО ПОФАЛИ ВАШИНГТОН ДЕКА ИСКРЕНО СЕ ТРУДИ ДА ЈА ЗАВРШИ ВОЈНАТА Трамп ќе поддржи безбедносни гаранции за Украина?!
На самитот во Алјаска ќе присуствува и рускиот специјален пратеник Кирил Дмитриев, шеф на државниот инвестициски фонд РДИФ, кој претходно разговарал со пратеникот на Доналд Трамп, Стив Виткоф, за можна бизнис-соработка меѓу Москва и Вашингтон, тврди извор запознаен со приликите.
Рускиот претседател Владимир Путин во четвртокот изјави дека американската администрација прави „искрени напори“ за решавање на конфликтот во Украина и посочи дека Москва и Вашингтон би можеле да постигнат договор за контрола на нуклеарното оружје, објави Ројтерс.
Зборувајќи на состанок во Кремљ со највисоките руски воени и цивилни претставници, Путин рече дека ги информира за состојбата на преговорите со САД за Украина, како и за билатералните разговори со Киев.
– Би сакал да ви кажам на која фаза сме со актуелната американска администрација, која, како што е познато, според мое мислење прави прилично енергични и искрени напори да се запре борбата, да се стави крај на кризата и да се постигнат договори што се од интерес за сите страни, вклучени во овој конфликт – рече Путин.
Тој додаде дека разговорите со САД се насочени кон создавање „долгорочни услови за мир меѓу нашите земји, во Европа и во светот во целина, доколку постигнеме договори во областа на контролата на стратешкото офанзивно оружје во следните фази“.
Путин треба да одржи самит со американскиот претседател Доналд Трамп во Алјаска во петок.
Русија и САД располагаат со најголемите арсенали на нуклеарно оружје во светот. Последниот преостанат столб на контролата на нуклеарното оружје меѓу двете земји е договорот „Њу СТАРТ“, кој треба да истече на 5 февруари 2026 година.
Трамп ќе поддржи безбедносни гаранции за Украина?!
Сојузниците на Украина рекоа дека претседателот Доналд Трамп е подготвен да поддржи безбедносни гаранции за Киев — потенцијално значајна, но сè уште нејасна понуда, која во четвртокот, еден ден пред самитот САД–Русија за завршување на војната, би можела да ѝ даде надеж на Украина, објави Ројтерс.
Трамп покажал подготвеност да се приклучи на гаранциите на итен виртуелен состанок со европските лидери и со украинскиот претседател Володимир Зеленски во средата, рекоа лидерите, иако потоа јавно не ги спомена.
Зеленски и неговите сојузници изразија извесен оптимизам додека ги засилуваа напорите да спречат каков било договор меѓу Трамп и Путин на состанокот во Алјаска в петок, кој би ја оставил Украина ранлива на понатамошни руски напади.
Петочниот самит доаѓа во еден од најтешките моменти за Украина во војната, најголемата во Европа од Втората светска војна, која од целосната инвазија на Русија во февруари 2022 година убила десетици илјади и раселила милиони.
Зборувајќи по средбата во средата, францускиот претседател Емануел Макрон рече дека Трамп инсистирал НАТО да не биде дел од безбедносните гаранции, кои би биле дизајнирани да ја заштитат Украина од идни напади во поствоен период.
– Претседателот Трамп го кажа тоа јасно, велејќи работи што ми се важни, а тоа е дека НАТО не треба да биде дел од овие безбедносни гаранции, и знаеме дека ова е клучно прашање, особено за руската страна, но и дека САД и сите подготвени сојузници треба да бидат дел од нив. Тоа е она на што сме посветени. И за мене, ова денес беше важно појаснување – рече Макрон.
Германскиот канцелар Фридрих Мерц, кој ја водеше средбата во средата, исто така рече дека ќе има силни безбедносни гаранции.
– Претседателот Трамп го потврди тоа денес и рече дека е вклучен – изјави тој за новинарите.
Еден европски функционер за Ројтерс изјавил дека Трамп на повикот рекол дека е подготвен да обезбеди одредени безбедносни гаранции за Европа, без да објасни што конкретно значи тоа. Тоа било првпат толку експлицитно да говори за ваква поддршка од почетокот на разговорите предводени од Британија и од Франција во март.
– Се чинеше како голем чекор напред – рекол функционерот, но засега не е јасно што би значеле таквите гаранции во пракса.
Европската комисија ја поздрави понудата на Трамп
Европската комисија ја поздрави понудата на Трамп, но рече дека деталите треба да ги даде Белата куќа.
Зеленски се сретна и со британскиот премиер Кир Стармер за да го искористи моментумот од средбите во средата.
Во средата, Трамп се закани со „тешки последици“ ако Путин не се согласи на мир во Украина, иако не прецизираше какви би можеле да бидат тие последици, но предупреди на економски санкции ако средбата во петок не даде резултат.
Сепак, Русија веројатно силно ќе се спротивстави на барањата на Украина и на Европа, а претходно изјави дека нејзиниот став не се сменил од јуни 2024 година, кога Путин првпат го изложи.
За подготовка на самитот во Алјаска, Путин одржа состанок со врвните функционери и претставници на руското раководство, објави ТАСС, повикувајќи се на портпаролот на Кремљ, Дмитриј Песков.
Советник од Кремљ рече дека Путин и Трамп ќе разговараат за „огромниот неискористен потенцијал“ за економски врски меѓу Русија и САД, како и за изгледите за завршување на војната — прв самит меѓу нивните земји од средбата на Путин со Џо Бајден во 2021 година.
Извор, запознаен со состанокот, рекол дека ќе учествува и специјалниот пратеник на Русија, Кирил Дмитриев, кој го води рускиот државен инвестициски фонд РДИФ и претходно имал разговори со специјалниот пратеник на Трамп, Стив Виткоф, за можна деловна соработка меѓу Москва и Вашингтон.