ТРАМП МУ ПИША НА ЛУЛА, СЕ ЗАКАНИ СО ЦАРИНИ ОД 50% Шефот на САД бара да сопре судењето за Болсонаро
Шефот на САД му напиша на шефот на Бразил дека „ловот на вештерки мора да заврши“ заканувајќи се со царина од 50% за бразилските производи. Претседателот на Бразил му одговори дека не прифаќа туторство од никого.
Претседателот на САД, Доналд Трамп вчера испрати писмо до бразилскиот колега Луис Инасио да Силва во кое го информира дека планира да воведе дополнителни царини од 50 проценти за бразилските производи како одговор за кривичното гонење на поранешниот претседател Жаир Болсонаро.
„Односот на Бразил кон поранешниот претседател Болсонаро е меѓународен срам“, напиша Трамп во писмото, опишувајќи го гонењето на поранешниот бразилски ултрадесничарски лидер како „лов на вештерки (што) мора веднаш да заврши“.
Министерството за надворешни работи на Бразил претходно објави дека го повикало вршителот на должноста амбасадор на САД на разговори во знак на протест поради поддршката на Амбасадата за Болсонаро, против кого има судски процес за обид за државен удар.
– Ние сме суверена земја. Не прифаќаме мешање или туторство од никого – изјави Силва на 7 јули, откако Трамп побара од Бразил да го „остави на мир“ поранешниот претседател Болсонаро.
Меѓу царините кои треба да стапат на сила на 1 август, Трамп исто така објави царина од 50 отсто за бакар, велејќи на социјалните мрежи дека одлуката е донесена по проценка на националната безбедност на САД.