ЌЕ РАЗГОВАРА ЛИ ТРАМП СО ПУТИН ОВАА НЕДЕЛА? Советниците му велат едно, во Москва велат друго

Луѓе блиски до американскиот претседател Доналд Трамп го советувале да не му се јавува на Владимир Путин додека рускиот претседател не се обврзе на целосен прекин на огнот во Украина, објави Ен-Би-Си Њуз, цитирајќи претставници на администрацијата.

Во извештајот се додава дека официјален претставник предупредил дека Трамп може одеднаш да одлучи дека сака да разговара со Путин.

Трамп во неделата изјави за Ен-Би-Си Њуз дека планира да разговара со Путин оваа седмица.

Во меѓувреме, рускиот претседател го испраќа својот близок соработник Кирил Дмитриев во Вашингтон. Дмитриев изјави дека односите меѓу Русија и САД покажуваат позитивна динамика.

– Гледаме значително подобрување на комуникацијата меѓу двете земји. Ова се однесува и на економските односи, каде што постои реален интерес за соработка во клучни сектори – изјави Дмитриев на економски форум во Пекинг.

И покрај санкциите што Вашингтон ги одржува против Москва, рускиот претставник смета дека постои простор за дијалог и дека некои американски компании веќе бараат начини за зголемена соработка со руските партнери.

Дмитриев, специјален пратеник за инвестиции на рускиот претседател Владимир Путин, ја посети Белата куќа во Вашингтон на 2 и 3 април 2025 година. Ова беше прва посета на висок руски функционер во САД од инвазијата на Украина во 2022 година.

Тој се сретна со специјалниот пратеник на претседателот Трамп, Стив Виткоф, за да разговараат за можностите за деескалација на војната во Украина и за подобрување на односите меѓу САД и Русија.

Наводите за можни нови дипломатски контакти меѓу Вашингтон и Москва доаѓаат во време кога Трамп воведе реципрочни царини за увоз од земји од целиот свет.

На списокот, заедно со Канада и Мексико, беше изоставена и Русија.