ВРЕДИ БАРА ВЕТИНГ ЗА БЛЕРИМ БЕЏЕТИ „Дваесет години е во политиката, не му е срам?!“
Долг е списокот на „гревови“ што коалицијата Вреди му ги припишува на Блерим Беџети, еден од водечките луѓе на ДУИ.
ДУИ повторно зборува за „прочистување“ и ветинг, но единственото што треба да направат е да си го прочистат сопствениот врв. Блерим Беџети е совршен пример за тоа како ДУИ ги блокира промените и не дава простор на нови, млади и чесни лица.
Ова се вели во соопштението на коалицијата Вреди.
„Блерим Беџети е дваесет години во политика и не му е срам?! Пратеник, министер, градоначалник, па повторно пратеник – Блерим Беџети не излегол од државна функција веќе две децении. Зар нема храброст да направи нешто надвор од политиката? Или можеби знае дека само во ДУИ и преку институциите може да продолжи да си гради лични привилегии?“, се вели во соопштението на Вреди, во кое се тврди дека Блерим Беџети е најблискиот соработник на Сашо Мијалков и на Артан Груби.
„Во скандалот со прислушкуваните разговори, Блерим Беџети беше фатен како договара судски одлуки и влијае врз именувањето на судии и обвинители. Неговото име беше поврзано со договори кои обезбедуваа партиска контрола врз правосудството“, обвинува коалцијата.
ДУИ е синоним за корупција и узурпација на власта и затоа нивниот „ветинг“ е уште една лага, тврди коалицијата Вреди.