СЕ ВЕШТАЧАТ ТРАГИТЕ ОД СИНОЌЕШНИТЕ 4 ИСТОВРЕМЕНИ ПОЖАРИ ВО КУМАНОВО Обвинителството потврди дека едно од запалените возила е на јавен обвинител
Преземени се сите дејствија и се испитуваат причините и евентуалните мотиви за опожарувањето, соопшти Јавното обвинителство.
Дежурен јавен обвинител од Основното јавно обвинителство Куманово изврши увиди на локациите каде беа опожарени два автомобили и една деловна просторија, информира Јавното обвинителство. Се испитува и евентуално дали има мотив за подметнување на пожарите.
ЈО потврди дека еден од изгорените автомобили е во сопственост на јавен обвинител.
„Преземени се сите дејствија и се испитуваат причините и евентуалните мотиви за опожарувањето. Прибрани се траги од лице место кои ќе бидат предмет на вештачење, а се врши увид и во снимки од камери за видео надзор“, соопшти Јавното обвинителство.
Според дел од медиумите, обвинителот на кој му изгоре возилото е Џелал Бајрами.
Кумановската полиција информираше дека се запалени три автомобили и еден дуќан.
– На 2.12.2024 година во 3.20 часот во СВР Куманово било пријавено дека е опожарен деловен објект на улицата 11 Октомври, сопственост на М.Ј. од Куманово. Исто така, било пријавено дека биле опожарени три патнички возила на улиците Трст, Вардарска и Никола Вапцаров во Куманово, и тоа патничко моторно возило „фолксваген пасат“ со кумановски регистарски ознаки, сопственост на Џ.Б., патничко моторно возило „ауди“ со кумановски регистарски ознаки, сопственост на А.Е. и патничко моторно возило „ауди“ со кумановски регистарски ознаки, сопственост на М.Ш. – информираат од кумановската полиција.
Ноќеска во Куманово речиси истовремено се случиле неколку пожари, во кои изгоре дуќан на членот на Советот на Општина Куманово, Фитор Јакупи и автомобили.
ДУИ реагираше дека пожарите се подметнати и ги оцени како тешки настани, дела од омраза и опасна криза.