АДМИНИСТРАЦИЈАТА ГО БЛОКИРА РЕШЕНИЕТО Славески ги обвинува Арсовска и нејзините службеници за саботажа на решението за превозниците

Претседателот на Советот на Град Скопје, Трајко Славески, денеска изрази разочарување поради одложувањето на потпишувањето на заклучокот кој се однесува на исплатата на приватните автобуски превозници. Тој обвини дека администрацијата, веројатно по налог на градоначалникот Данела Арсовска, го опструира решавањето на проблемот.

– Иако како Претседател на Совет замолив Сектор за поддршка на Совет, кој е дел од градската администрација, да го подготви заклучокот и да го проследи до градоначалникот Арсовска во рок од половина час по завршувањето на седницата, тоа не беше направено. Не само што не беше завршено во рокот, туку по еден и половина час, сè уште не беше доставено. Очигледно, администрацијата се противи на решавањето на проблемот со приватните превозници – изјави Славески.

Тој нагласи дека Советот донесе заклучок со кој се задолжува градоначалникот Арсовска што побрзо да предложи измени и дополнувања на одлуката за исплата на приватните превозници, и тоа најдоцна до крајот на денешниот ден. Славески посочи дека ова продолжување на состојбата е неприфатливо за Советот и јавноста, бидејќи не само што ги загрозува интересите на приватните превозници, туку и создаето дополнителен хаос во јавниот транспорт на Скопје.

– Останувам да го чекам актот во мојата канцеларија во Совет на град Скопје. Нема да дозволиме вакви опструкции да ги блокираат решавањата на клучните проблеми на нашите граѓани – заклучи Трајко Славески.

 

Совет на град Скопје по петчасовна расправа на итна вонредна седница со мнозинство гласови донесе заклучок со кој се задолжува градоначалникот Арсовска во најкус можен рок, по можност во текот на денешниот ден, 29 ноември 2024 година, да предложи измени и дополни на одлуката за… pic.twitter.com/lkz973lFmx

— Trajko Slaveski (@TSlaveski) November 29, 2024

Иницијативата за зголемување на цената на услугите за приватните превозници кои соработуваат со ЈСП, беше предложена од советникот Горан Арсов од ВМРО-НП. Според Арсов, за да се решат проблемите со недостаток на автобуси, потребно е да се вклучат приватни превозници на оние линии каде што ЈСП не обезбедува доволно возила.

– Исто така, во новите договори што ќе се склучат со приватните превозници во мај следната година, треба да се предвиди исклучување на автобуси со мотори Еуро 2, 3 и 4, поради високото ниво на загадување – истакна Арсов.

Советникот од ВМРО-ДПМНЕ, Мартин Стојановски, го поддржа предлогот за зголемување на цената за 30 денари по изминат километар во периодот од декември до мај. Според него, ова решение е прифатливо за приватните превозници, кои се откажале од најавената блокада.

– Тоа е доказ дека се грижиме за граѓаните – рече Стојановски, додавајќи дека средствата за зголемувањето ќе се обезбедат од ребалансот на буџетот во декември и ќе бидат вклучени и во буџетот за 2025 година.

Меѓутоа, советникот од СДСМ, Гордан Шутаров, истакна дека предложеното решение не е реално, бидејќи општините можат да носат ребаланс на буџетот само до 15 ноември.

– Ребаланс на буџетот по 15 ноември не поминува ниту на една општина. Ако сакаме да им излеземе во пресрет на граѓаните, потребно е искрено и со дијалог да се решат овие проблеми – рече Шутаров, додавајќи дека треба да се ревидира постапката на тарифирање на приватните превозници од страна на ЈСП.

Координаторката на Советничката група на СДСМ, Љубица Јанчева, го критикуваше предложеното решение од ВМРО-ДПМНЕ, нагласувајќи дека од буџетот на Град Скопје за 2024 година нема средства за ова зголемување.

– Ако се грижевте за граѓаните, ќе седневме заедно и ќе најдевме решение. Ако имавте искрена намера, ќе известевте преку електронска пошта – изјави Јанчева.

Од говорницата градоначалничката Арсовска од говорницата посочи дека цената се утврдува според критериуми и формула каде ќе бидат во предвид земени сите апсекти и истата не смее да се утврдува поинаку.

– Тие повеќе бараа, не знам како се испреговоривте да ја намалите цената, но не смее да биде ни повеќе ни помалку од она што го диктира пазарот и условите, не се одредува врз основ на желба. Повикувам на одговорност на советот, одлуката што ќе ја донесете самите ќе имате одговорност на истата, а ние по ваше задолжение ќе направиме Ако сакате да направиме нешто долгорочно тоа може службите да ви го објаснат, ако сакате да направите нешто од денес за утре, можам само да се иземам одговорност ако донесете било каков акт – рече Арсовска.

Приватните превозници кои порано ја напуштија седницата поради атмосферата која се создаде.. Велат дека се задоволни од предлог одлуката цената од километар да се покачи за 30 денари, а во сообраќај велат се најверојатно се враќаат во понеделник.